ःपरशुराम घाटातील भराव पेढे गावात

-ratchl१६७.jpg-
P२५N७१०६७
चिपळूण ः पेढे येथे घर परिसरात साचलेला चिखल.
-----
परशुराम घाटातील भराव पेढे गावात
वस्तीत चिखल; ठेकेदार कंपनीविरोधात असंतोष
सकाळ वृत्तसेवा
चिपळूण, ता. १६ ः मुंबई-गोवा महामार्ग चौपदरीकरणाअंतर्गत परशुराम घाटात खचलेल्या काँक्रिटीकरणाच्या भागात गॅबियन वॉल उभारली जात आहे. या भिंतीसाठी मोठ्या प्रमाणात भराव केला आहे. मुसळधार पावसात हा संपूर्ण भराव पायथ्यालगतच्या पेढे गावात वाहून गेल्याने भरवस्तीत चिखल व दलदल निर्माण झाली आहे. घरांच्या आजूबाजूला चिखल साचल्याने ग्रामस्थ हैराण झाले आहेत.
गेल्या तीन महिन्यांपासून परशुराम घाटातील मध्यवर्ती भागात लोखंडी जाळीच्या आधारे गॅबियन वॉल उभारली जात आहे. सुमारे ९० मीटरहून अधिक लांबीची ही भिंत दगडमातीच्या मिश्रणातून उभारण्याचा प्रयत्न केला जात आहे. आतापर्यंत या भिंतीचे काम ५० टक्के पूर्ण झाले आहे; मात्र अजूनही बरेचसे काम बाकी असून, त्यासाठी मोठ्या प्रमाणात भरावाची माती टाकण्यात आली आहे. आता पावसाच्या पाण्यासोबतच ही माती वाहून डोंगराच्या पायथ्याला असलेल्या वस्तीत ती येऊ लागली आहे. गेल्या काही दिवसांपासून सातत्याने सुरू असलेल्या या पावसात मोठ्या प्रमाणात चिखल भरवस्तीत वाहून आल्याने दलदल निर्माण झाली आहे. घरांच्या आजूबाजूला चिखल साचल्याने घराबाहेर पडणे कठीण झाले आहे. याबाबत संबंधित ठेकेदार कंपनी व राष्ट्रीय महामार्ग विभागाच्या अधिकाऱ्यांशी वेळोवेळी चर्चा करून देखील दखल घेतली नाही. आता पावसामुळे ही परिस्थिती हाताबाहेर गेली असून, त्याचा धोका अधिक वाढला आहे. याबाबत पेढे गावच्या सरपंच आरूषी शिंदे म्हणाल्या, मे महिन्यात झालेल्या पावसातही परशुराम घाटातील माती गावच्या शेतात आली होती. ही माती काढण्याची मागणी केल्यानंतर काही प्रमाणात ती काढण्यात आली; मात्र माती उचलण्याचे सर्व काम पूर्णत्वास गेलेले नाही. त्यातच पुन्हा एकदा भरपावसात घाटातील माती वस्तीत येऊ लागल्याने ग्रामस्थ हैराण झाले आहेत. ठेकेदार कंपनी व राष्ट्रीय महामार्ग विभागाच्या अधिकाऱ्यांनी याची दखल घ्यावी अन्यथा ग्रामस्थांच्या रोषाला सामोरे जावे लागेल, असा इशाराही सरपंच शिंदे यांनी दिला आहे.