विद्यार्थ्यांनो, ध्येयपूर्तीसाठी ध्येयवेडे व्हा ः गवस

71249

विद्यार्थ्यांनो, ध्येयपूर्तीसाठी
ध्येयवेडे व्हा ः गवस

शांतादुर्गा विद्यालयात विद्यार्थ्यांचे स्वागत

दोडामार्ग, ता. १७ : विद्यार्थ्यांनी आपल्या आयुष्यात यशस्वी होण्यासाठी ध्येय ठरविले पाहिजे. ध्येयपूर्तीसाठी ध्येयवेडे व्हा, असे आवाहन पिकुळे ग्रामस्थ हितवर्धक मंडळ मुंबईचे सचिव प्रमोद गवस यांनी केले.
नवीन शैक्षणिक सोमवारी (ता. १६) वर्ष सुरू झाले. यानिमित्त श्री शांतादुर्गा माध्यमिक विद्यालय पिकुळे शाळेत विद्यार्थ्यांच्या स्वागत समारंभात गवस बोलत होते. पिकुळे विद्यालय आणि हितवर्धक मंडळ मुंबई सुवर्णमहोत्सव सोहळा नुकताच दिमाखदारपणे पार पडला. यापुढे सुवर्णमहोत्सवी वर्ष साजरे करण्याचा निर्णय मंडळाने घेतला आहे. याचाच एक भाग म्हणून मंडळाने यावर्षीच्या शैक्षणिक वर्षाच्या पहिल्या दिवशी विद्यार्थ्यांचे स्वागत केले. सुवर्णमहोत्सवानिमित्त ईशस्तवन, स्वागतगीत आणि ग्रंथदिंडीत सहभागी ३० विद्यार्थ्यांना कंपास आणि ९५ विद्यार्थ्यांना दप्तरे सुपूर्द केली. यावेळी मंडळ सचिव प्रमोद गवस, सदस्य विद्याधर धुरी, मुख्याध्यापक अशोक आबुंलकर, सिद्धिविनायक नाट्य मंडळ मालक शत्रू गवस, माजी उपाध्यक्ष सुभाष गवस, संदीप गवस, अमित गवस, सुहास देसाई, रत्नदीप गवस आदी उपस्थित होते. शिक्षिका पूर्वा गवस यांनी सूत्रसंचालन केले. मुख्याध्यापक आंबुलकर यांनी प्रास्ताविक केले. सौ. गवस यांनी आभार मानले.