सावंतवाडीची २० गावे जोडली ''वेंगुर्ले''ला

सावंतवाडीची २० गावे जोडली ‘वेंगुर्ले’ला
महावितरण कारभाराचा ग्राहकांना मनस्ताप; ठाकरे सेनेचा आंदोलनाचा इशारा
सकाळ वृत्तसेवा
सावंतवाडी, ता. १७ः तालुक्यातील जवळपास २० गावे वीज महावितरण कंपनीच्या वेंगुर्ले तालुका कार्यालयाशी जोडली गेल्याने स्थानिक ग्राहकांना प्रचंड मनस्ताप आणि आर्थिक भुर्दंड सोसावा लागत आहे. सध्या वारंवार वीज खंडित होण्याच्या घटनांमुळे ग्राहक त्रस्त असून, तक्रारीसाठी वेंगुर्ले येथील कार्यालयात जावे लागत असल्याने वेळ आणि पैशांचा अपव्यय होत आहे. स्थानिक ग्राहकाने तक्रार देण्यासाठी फोन केला तर उचलला जात नाही किंवा बंद लागतो. याबाबत ठाकरे शिवसेनेचे विधानसभा प्रमुख रुपेश राऊळ यांनी वीज वितरण कंपनीकडे ही गावे तातडीने सावंतवाडी तालुका कार्यालयाशी जोडण्याची मागणी केली असून, अन्यथा घेराव घालण्याचा इशारा दिला आहे.
याबाबत श्री. राऊळ यांनी सांगितले की, सावंतवाडी आणि वेंगुर्ले हे दोन स्वतंत्र तालुके असतानाही वीज वितरण फिडरमुळे ही क्लिष्ट परिस्थिती निर्माण झाली आहे. मळेवाड, गुळदुवे, तिरोडा, नाणोस, किनळे, सातार्डा, साटेली, कवठणी, आरोस, दांडेली, तळवणे, सातोसे, आजगाव, भोमवाडी, धाकोरे, नेमळे यांसारखी सावंतवाडी तालुक्यातील अनेक गावे गेल्या अनेक वर्षांपासून महावितरणच्या वेंगुर्ले झोनमध्ये समाविष्ट आहेत. यामुळे ग्राहकांना आपल्या तक्रारी आणि अडचणी मांडण्यासाठी वेंगुर्ले येथे जावे लागते. यामुळे त्यांचा वेळ आणि पैसा वाया जातो. सावंतवाडी तालुक्याच्या ठिकाणी तहसीलदार कार्यालय, पंचायत समिती कार्यालय, कृषी कार्यालय, आरोग्य, बँक या सर्व कामांसाठी ग्रामस्थांची ये-जा असते. त्यामुळे सावंतवाडी तालुका सर्व गोष्टींनी सोईस्कर आहे, हे लक्षात घेणे गरजेचे आहे.
याबाबत स्थानिक नागरिकांकडून सातत्याने मागणी केली जात आहे; परंतु त्याकडे अधिकारी आणि लोकप्रतिनिधी दुर्लक्ष करत असल्याचा आरोप राऊळ यांनी यावेळी केला.

चौकट
मळेवाड येथील महावितरण कंपनीचे सब-स्टेशन आहे सावंतवाडी तालुक्यात असूनही त्याचे नियंत्रण वेंगुर्ले येथून केले जाते. वेंगुर्ले तालुक्यातील रेडी येथील फिडरमुळे हा गोंधळ आणखी वाढला आहे. त्यामुळे महावितरणने सावंतवाडी तालुक्यातील सर्व गावांना तालुक्याच्या मुख्य कार्यालयाशी संलग्न करून वेंगुर्लेशी असलेली त्यांची वीज वितरण जोडणी तोडवी. ही आमची मागणी मान्य न झाल्यास वीज वितरण कंपनीच्या कार्यालयास घेराव घातला जाईल.
- रुपेश राऊळ