चिपळूण ःपुराच्या पाण्यामुळे स्मशानभूमीत अडकले ग्रामस्थ

ratchl१७१.jpg
71266
सावर्डेः स्मशानभूमीत कापशी नदीचे पाणी शिरल्याने दहाव्या विधीसाठी गेलेले ग्रामस्थ अडकून पडले होते.
-----------
पुराच्या पाण्यामुळे स्मशानभूमीत अडकले ग्रामस्थ
सावर्डेतील घटना; कापशी नदीचे पाणी स्मशानभूमीत
सकाळ वृत्तसेवा
चिपळूण, ता. १७ : मुसळधार कोसळणाऱ्या पावसाने सर्वत्र दाणादाण उडवली आहे. पावसाचा जोर वाढल्याने रविवारी सावर्डे येथील स्मशानभूमीत कापशी नदीचे पाणी घुसल्याने दहाव्याच्या विधीसाठी गेलेल्या ग्रामस्थांची धावपळ उडाली. काहीवेळाने पाणी कमी झाल्यावर हे ग्रामस्थ सुखरूप बाहेर आले.
गेले दोन-तीन दिवस सावर्डे पंचक्रोशीत मुसळधार पाऊस कोसळत आहे. त्यामुळे गावातील नद्या दुथडी भरून वाहत होत्या. गावातील शंकराच्या मंदिराजवळ नव्याने बांधलेल्या कापशी नदीवरील पुलाची उंची कमी आहे. आमदार शेखर निकम यांच्या निधीतून हा पूल बांधला होता; मात्र कमी उंचीमुळे नदीचे पाणी पात्राबाहेर पडून परिसरात पसरले. हे पाणी थेट नदीपात्राजवळील स्मशानभूमीत शिरले. त्यामुळे स्मशानभूमी पाण्याखाली गेली. या वेळी स्मशानभूमीत गावातील काही मंडळी दहाव्याच्या विधीसाठी गेले होते. अचानक पाणी वाढल्यामुळे ते पाण्यात अडकले. काही वेळानंतर पाणी कमी झाल्यानंतर पाण्यातूनच वाट काढत हे ग्रामस्थ सुखरूप बाहेर आले.