शिक्षकांचे निवृत्तीवेतन थकले

शिक्षकांचे निवृत्तीवेतन थकले

सिंधुदुर्गातील स्थिती ः संघटनेतर्फे सीईओंना निवेदन

सकाळ वृत्तसेवा
सिंधुदुर्गनगरी, ता. १७ ः सिंधुदुर्ग जिल्हा निवृत्त शिक्षकांचे मे महिन्याचे निवृत्तीवेतन अद्याप मिळालेले नाही. याकडे लक्ष वेधण्यासाठी तसेच शासन निर्णयाप्रमाणे दरमहा १ तारीखलाच निवृत्ती वेतन मिळावे, या मागणीचे निवेदन महाराष्ट्र राज्य निवृत्त शिक्षक शिक्षकेतर कर्मचारी व अधिकारी संघटना शाखा सिंधुदुर्गच्या वतीने जिल्हा परिषद मुख्य कार्यकारी अधिकारी यांना दिले.
निवृत्त शिक्षकांचे निवृत्तीवेतन होण्यास विलंब झाला आहे. जून महिना संपत आला तरी अद्याप निवृत्तीवेतन मिळाले नसल्याने संघटनेचे अध्यक्ष शरद नारकर, सरचिटणीस नितीन जठार, जिल्हा कार्याध्यक्ष डी. बी. रेडकर, राज्य उपाध्यक्ष जी. बी. चव्हाण यांच्यासह जिल्ह्यातील निवृत्त शिक्षकांनी आज वित्त अधिकाऱ्यांसह शिक्षणाधिकाऱ्यांची भेट घेतली. त्यांच्याकडून निवृत्ती वेतन अद्याप का झाले नाही, याची खात्री करून त्यानंतर मुख्य कार्यकारी अधिकाऱ्यांना निवेदन सादर केले. शिक्षणाधिकाऱ्यांनी निवृत्ती वेतन आज जमा होईल, असे सांगितले असले तरी निवृत्ती वेतन देण्यास विलंब का झाला? त्याला जबाबदार कोण? असा जाब विचारत तीव्र नाराजी व्यक्त केली.
निवेदनात म्हटले आहे की, निवृत्त कर्मचाऱ्यांचे निवृत्तीवेतन शासन निर्णयानुसार दरमहा १ तारीखला करावे. निवृत शिक्षकांचे वरिष्ठ श्रेणी व निवड श्रेणी प्रस्ताव निवृत्तीपूर्वीपासूनच प्रलंबित आहेत, ते तत्काळ मंजूर होऊन वेतनामध्ये सुधारणा करण्याबाबत अंमलबजावणी व्हावी. शासन निर्णयानुसार ३० जूनला निवृत्त होणाऱ्या कर्मचाऱ्यांना एक काल्पनिक वेतनवाढ देऊन निवृत्ती प्रस्ताव मंजूर करावा. वय वर्ष ८० ते १०० पूर्ण केलेल्या निवृत्त कर्मचाऱ्यांचे निवृत्ती वेतन शासन निर्णयाप्रमाणे वाढ होऊन त्यानुसार कार्यवाही करावी, आदी मागण्या निवेदनातून केल्या आहेत.