धनगर समाजातर्फे अहिल्यादेवींना वंदन

धनगर समाजातर्फे
अहिल्यादेवींना वंदन
तळेरे : अहिल्यादेवी होळकर यांच्या विचारांचा जागर होणे आवश्यक आहे. बहुजन समाजाने त्यांच्या विचारानुसार वाटचाल करावी, असे प्रतिपादन आमदार रामहरी रुपनवर यांनी केले. अहिल्यादेवी सामाजिक व शैक्षणिक विकास ट्रस्ट व ऑल इंडिया धनगर समाज महासंघातर्फे कराड येथे आयोजित अहिल्यादेवी होळकर यांच्या त्रिशताब्दी जयंती निमित्ताने आयोजित पुरस्कार वितरण सोहळ्यात ते बोलत होते. यावेळी विविध क्षेत्रातील १४६ महिलांना आदर्श माता पुरस्कार व अहिल्यारत्न पुरस्कार देऊन सन्मानित करण्यात आले. या कार्यक्रमाचे प्रास्ताविक प्रवीण काकडे यांनी केले. कार्यक्रम यशस्वी होण्यासाठी प्रा. दिलीप बरकडे, प्रा. शीतल काकडे, सतीश थोरात, आनंदराव कचरे, रामचंद्र पुकळे, तुकाराम कोकरे, बाबुराव शेडगे, अंकुश मोरे, दत्ता खरात, विष्णू हुलवान, बाबासो काकडे, कैलास काकडे, मृणाल दडस, नारायण कोकरे, अजित ताटे, इंद्रजित ताटे, सुजित गलांडे, अर्जुन चव्हाण यांनी विशेष परिश्रम घेतले. एम. डी. दडस यांनी आभार मानले.
...................
सांगेली येथे आज
आरोग्य चिकित्सा
सावंतवाडी ः ग्रामीण भागातील नागरिकांच्या आरोग्याचा विचार करून लोककल्प फाउंडेशन आणि लोकमान्य मल्टिपर्पज को-ऑप. सोसायटी लि. यांच्या संयुक्त विद्यमाने उद्या (ता. १८) सकाळी १० ते सायंकाळी ३ या वेळेत सांगेली ग्रामपंचायत येथे मोफत आरोग्य तपासणी शिबिराचे आयोजन केले आहे. या शिबिरात कान व घसा तपासणी, हृदयरोग तपासणी, बालरोग तपासणी तसेच सर्वसाधारण वैद्यकीय तपासण्या तज्ज्ञ डॉक्टरांच्या मार्गदर्शनाखाली होणार आहेत. शिबिराचा लाभ घेण्याचे आवाहन फाउंडेशनने केले आहे.
...................
गणित प्रज्ञाशोध
परीक्षेत वेदचे यश
मालवण ः राज्य गणित अध्यापक महामंडळ संलग्न सिंधुदुर्ग जिल्हा गणित अध्यापक मंडळातर्फे घेतलेल्या गणित प्रज्ञाशोध परीक्षेत डॉ. शिरोडकर एज्युकेशन सोसायटी, मुंबई संचलित रेकोबा माध्यमिक विद्यालयाचा आठवीतील विद्यार्थी वेद कुबल याने राज्यस्तरीय सिल्व्हर कॅटेगरीत प्रमाणपत्र मिळवून यश प्राप्त केले. त्याला गणित शिक्षक आर. बी. गोसावी व पी. पी. कुबल यांचे मार्गदर्शन लाभले. त्याचे मुख्याध्यापक खोचरे, माजी मुख्याध्यापक हिंदळेकर, संस्थेचे पदाधिकारी, केंद्रप्रमुख राजेंद्र परब, शिक्षकेतर कर्मचारी, पालक, विद्यार्थ्यांनी अभिनंदन केले.
-------
वैश्यवाणी समाजातर्फे
२९ ला सत्कार सोहळा
कुडाळ ः कुडाळ तालुका वैश्यवाणी समाजातर्फे तालुक्यातील वैश्य ज्ञातीतील गरजू व हुशार विद्यार्थ्यांना शालोपयोगी वस्तूंचे वितरण आणि गुणवंत विद्यार्थी गौरव व सत्कार कार्यक्रम २९ जूनला सकाळी १०.३० वाजता येथील महालक्ष्मी सभागृह क्र. २ येथे आयोजित करण्यात आला आहे. तालुक्यातील वैश्यवाणी समाजातील विद्यार्थ्यांनी संपर्क साधावा, असे आवाहन केले आहे.