पुरामुळे विलवडेकडे जाणारी वाहतूक दिवसभर बंद

विलवडेकडे जाणारी वाहतूक बंद
लांजा,ता. १७ ः लांजा तालुक्यातील मुचकुंदी नदीला आलेल्या पुराचे पाणी विलवडेतील अंतर्गत रस्त्यावर आल्यामुळे वाकीवाडीकडे जाणारा रस्ता व गावातील अन्य रस्ते पाण्याखाली गेले होते. ररस्त्यावर चार ते पाच फूट पाणी होते. त्यामुळे विलवडे परिसरातील वाहतूक दिवसभर बंद होती. पुराचे पाणी शेतामध्ये शिरल्यामुळे शेतीचेही नुकसान झाले आहे.
सोमवारी मध्यरात्रीपासून पडणाऱ्या पावसाने लांजा तालुक्याला अक्षरशः झोडपून काढले. तालुक्यात असलेल्या ११ धरणातील पाणीसाठा वाढला आहे. सोमवारी दिवसभर पाऊस सुरू राहिल्याने वीजपुरवठा वारंवार खंडित होत होता. मुचकुंदी, काजळी, बेनी नद्यांची पात्रे दुथडी प्रवाहित होती. मुसळधार पावसामुळे विलवडे वाकीवाडीकडे जाणारा रस्ता जलमय झाल्याने विलवडे परिसरातील वाहतूक बंद होती. त्यामुळे दळणवळणाच्यादृष्टीने दिवसभर तालुक्याशी संपर्क तुटला होता. अन्य मार्ग नसल्यामुळे नागरिकांची गैरसोय झाली. लांजा बाजारपेठेत पाणी शिरून महामार्गावर पाणी भरले होते.