जलद प्रवासी बोट वाहतुकीचा रेडीपर्यंत विस्तार आवश्यक

जलद प्रवासी बोट वाहतुकीचा
रेडीपर्यंत विस्तार आवश्यक
मंगेश तळवणेकर ः पालकमंत्र्यांना दिले निवेदन
सकाळ वृत्तसेवा
सावंतवाडी, ता. १७ ः कोकणवासीयांच्या सेवेसाठी लवकरच सुरू करण्यात येणारी भाऊचा धक्का ते रत्नागिरी विजयदुर्ग मालवण अशी जलद गतीची प्रवासी बोट वाहतूक सेवा रेडी बंदरापर्यंत विस्तारित करण्यात यावी, अशी मागणी सामाजिक कार्यकर्ते मंगेश तळवणेकर यांनी राज्याचे मत्स्य उद्योग व बंदर विकास मंत्री तथा जिल्ह्याचे पालकमंत्री नीतेश राणे यांच्याकडे केली आहे.
तळवणेकर यांनी यासंदर्भात मंत्री राणे यांना निवेदन दिले आहे. त्यात असे म्हटले की, सुरू करण्यात येणाऱ्या प्रवासी बोट वाहतुकी सेवेमुळे निश्चितच कोकणातील पर्यटनाला चालना मिळणार आहे. रोजगारही उपलब्ध होणार आहे. या सेवेमुळे कोकणवासीय पाच तासांत मालवण येथे पोहोचणार आहेत. ही कौतुकास्पद बाब आहे; परंतु ही सेवा केवळ मालवणपर्यंत सुरू न करता ती पुढे रेडी बंदरापर्यंत विस्तारित करण्यात यावी, जेणेकरून याचा लाभ रेडी, वेंगुर्ले, शिरोडा, मोचेमाड, सातार्डा, सातोसे, आरोंदा या दशक्रोशीला होऊ शकतो. सद्य:स्थितीत या दशक्रोशीमध्ये असलेल्या ग्रामस्थांना रेल्वे प्रवासासाठी सावंतवाडी रेल्वे स्थानकाकडे यावे लागते, तर राष्ट्रीय महामार्गावर येण्यासाठी मळगाव अगर बांदा येथे यावे लागते. विमान सेवेसाठी मोपा, वास्को, दापोली, चिपी येथे जावे लागते. प्रवासी बोट सेवा रेडी बंदरापर्यंत विस्तारित केल्यास या दशक्रोशीतील जनतेचा प्रवास सुलभ व जलद होणार असून, स्थानिकांना रोजगार उपलब्ध होणार आहे, ज्यामुळे या दशक्रोशीला गतवैभव प्राप्त होणार आहे. कोकणवासीयांचे प्रवासी जलवाहतुकीचे पन्नास वर्षांचे स्वप्न सत्यात उतरणार आहे. यामुळे रेल्वे व राष्ट्रीय महामार्गावरील वाहतुकीचा ताणही कमी होणार आहे. त्यामुळे या मागणीचा विचार करावा, अशी विनंती त्यांनी केली आहे.