गुणवंतांच्या पाठीवर कौतुकाची थाप

71346

गुणवंतांच्या पाठीवर कौतुकाची थाप

‘मिलाग्रीस’चा उपक्रम; सावंतवाडीत गुणगौरव सोहळा उत्साहात

सकाळ वृत्तसेवा
सावंतवाडी, ता. १७ ः येथील मिलाग्रीस हायस्कूलमध्ये दहावी व बारावीच्या गुणवंत विद्यार्थ्यांचा सत्कार सोहळा उत्साहात झाला. कार्यक्रमाच्या सुरुवातीला प्रार्थना गीताने परमेश्वराची आराधना करण्यात आली. यानंतर प्रमुख मान्यवरांच्या हस्ते दीप प्रज्वलित करण्यात आला. त्यानंतर उपस्थित विद्यार्थी व पालकांना शुभसंदेश देण्यासाठी दहावीच्या विद्यार्थ्यांनी नृत्याविष्कार करीत सर्वांचे मनोरंजन केले.
यावेळी उपस्थित सिंधुदुर्ग डायोसेशन एज्युकेशन ट्रस्टचे अध्यक्ष व विकार जर्नल फादर अँड्रयू डिमेलो, ज्युडिशियल विकार ऑफ डायोसिस ऑफ सिंधुदुर्गचे फादर मिल्टन मोंतेरो, सेंट जोसेफ चर्च भेडशीचे असिस्टंट पॅरिस्ट प्रिस्ट फादर रिचर्ड फर्नांडिस, प्रशालेचे व्यवस्थापक फादर मिलेट डिसोजा यांचे स्वागत मिलाग्रीस हायस्कूलचे मुख्याध्यापक फादर रिचर्ड सालदाना यांच्या हस्ते पुष्पगुच्छ देऊन करण्यात आले. तसेच दहावी व बारावीच्या गुणवंत विद्यार्थी व पालकांना सन्मानचिन्ह, प्रमाणपत्र व पुष्प देऊन मान्यवरांच्या हस्ते गौरविण्यात आले. यावेळी विद्यार्थ्यांच्या वतीने आर्या राणे हिने तर पालकांच्या वतीने सैनिक स्कूल आंबोलीचे उपमुख्याध्यापक व विज्ञान मंडळ सावंतवाडीचे अध्यक्ष ऋषिकेश गावडे यांनी मनोगत व्यक्त केले.
संस्थाध्यक्ष डिमेलो यांनी तसेच शाळेचे व्यवस्थापक डिसोजा यांनी सर्व यशस्वी विद्यार्थ्यांना त्यांच्या पुढील वाटचालीसाठी आपल्या मनोगतातून शुभेच्छा दिल्या. मुख्याध्यापक सालदाना यांनी यशस्वी विद्यार्थ्यांचे व पालकांचे अभिनंदन करीत त्यांचे आभार व्यक्त केले.
यावेळी हायस्कूल पर्यवेक्षिका संध्या मुणगेकर, मराठी प्रायमरी मुख्याध्यापिका सिस्टर कविता चांदी, इंग्लिश प्रायमरी पर्यवेक्षिका क्लिटा परेरा आदी उपस्थित होत्या. शारदा गावडे यांनी सूत्रसंचालन केले. प्रा. शेनीला गवंडे यांनी आभार मानले.