वेरळ येथे शास्त्रशुद्ध पध्दतीने विविध रोपांची लागवड

- rat१८p१९.jpg-
5N71523
खेड ः वेरळ येथील उद्योजक सदानंद कदम यांच्या जमिनीत सीआरए तंत्राचा वापर करत विविध वृक्ष लागवड करण्यात आली आहे.

वेरळ येथे शास्त्रशुद्ध पद्धतीने लागवड
सदानंद कदम यांचा यशस्वी प्रयोग; सीआरए तंत्राचा अवलंब
सकाळ वृत्तसेवा
खेड, ता. १८ : शेती ही एक शास्त्रशुद्ध प्रक्रिया आहे. तिचा योग्य अवलंब केल्यास उत्तम उत्पादन आणि टिकाऊपणाही साधता येतो. हे खेड तालुक्यातील वेरळ गावातील प्रगतशील शेतकरी सदानंद कदम यांनी कृतीतून दाखवून दिले आहे. हवामान अनुकूल शेतीपद्धतीनुसार कृषी विभागामार्फत राबवण्यात आलेल्या प्रकल्पात कदम यांनी विविध झाडांची यशस्वी लागवड केली आहे.
वेरळ गावातील कदम यांच्या शेतात केलेल्या या लागवडीची तालुका कृषी अधिकारी रवींद्र माळी यांनी पाहणी केली. या प्रसंगी ते म्हणाले, खेड तालुक्यात ४०० हेक्टर क्षेत्रावर हवामान अनुकूल लागवड करण्याचे उद्दिष्ट आहे. प्रत्येक गावात चार ते पाच हेक्टरवर शास्त्रशुद्ध शेती व्हावी, ही आमची योजना आहे. कदम यांची शेती हे त्याचे आदर्श उदाहरण आहे. शेतीत शाश्वतता आणि नफा मिळवायचा असेल तर पावसाळ्याच्या अगोदर योग्य लागवड अत्यंत गरजेची आहे. त्यामुळे इतर शेतकऱ्यांनी कदम यांच्या शेतातील लागवड प्रत्यक्ष पाहावी आणि कृषी विभागाकडून सल्ला घेऊनच लागवडीस पुढे यावं, असे आवाहन माळी यांनी केले आहे. हवामानातील अनिश्चिततेचा सामना करण्यासाठी सीआरए टेक्नॉलॉजी एक विश्वासार्ह पर्याय आहे. हा केवळ लागवडीचा प्रयोग नसून, निसर्गाशी सुसंवाद साधण्याचा प्रयत्न आहे. या पद्धतीमुळे उत्पादन तर वाढतंच; पण मातीची गुणवत्ता, पाण्याचा वापर आणि पर्यावरण यांचाही समतोल राखला जातो, असेही त्यांनी सांगितले तसेच वेरळ येथील शास्त्रशुद्ध शेतीची पाहणी करावी आणि कृषी विभागाच्या मार्गदर्शनाखाली पुढील योजना आखावी, अशी विनंती त्यांनी कृषी विभागाला केली आहे.