आंदोलन करताच अभियंत्याची नियुक्ती

71540

आंदोलन करताच अभियंत्याची नियुक्ती

आचरा उपविभाग ः सरपंचांसह ग्रामस्थांच्या मागणीची दखल

सकाळ वृत्तसेवा
आचरा, ता. १८ ः आचरावासीयांनी सरपंच जेरोन फर्नांडीस यांच्या नेतृत्त्वाखाली महावितरण कार्यालयात छेडलेले ठिय्या आंदोलन आणि शिवसेना जिल्हाप्रमुख दत्ता सामंत व दीपक पाटकर यांनी घेतलेल्या आक्रमक भूमिकेनंतर अखेर सहाय्यक अभियंता सौरभकुमार वर्मा
यांची नियुक्ती करण्यात आली. येथील शाखा कार्यालयात प्रधान तंत्रज्ञ यांची दोन दिवसांत नियुक्ती करण्यात येईल, असे पत्रही सरपंच फर्नांडीस यांना पाठवले आहे.
आचरावासीयांनी सोमवारी (ता.१६) छेडलेल्या आंदोलनाच्या अनुषंगाने कार्यकारी अभियंता व उपकार्यकारी अभियंता यांच्यामार्फत आचरा उपविभागाअंतर्गत येथील सहाय्यक अभियंता शाखा कार्यालयात व विरण शाखा कार्यालयासाठी सहाय्यक अभियंत्यांची नेमणूक केली आहे. येथील कार्यालयासाठी प्रधान तंत्रज्ञांचीही नियुक्ती आज किंवा उद्यापर्यंत करण्यात येईल, असे महावितरणकडून सरपंच फर्नांडीस यांना कळविले व नेमणुकीची प्रत त्यांना पाठविली आहे. मंगळवारी (ता.१७) सायंकाळी आचऱ्यासाठी नियुक्त केलेले सहाय्यक अभियंता वर्मा यांनी सुत्रे हाती घेतली आहेत. सरपंच फर्नांडीस यांनी त्यांचे स्वागत केले. यावेळी उपसरपंच संतोष मिराशी, आचरा व्यापारी संघटना उपाध्यक्ष परेश सावंत, मंदार सांबारी, खजिनदार जयप्रकाश परुळेकर, ग्रामपंचायत सदस्य मुझफ्फर मुजावर, चंद्रकांत कदम, महेंद्र घाडी, मंदार सरजोशी, अभिजीत सावंत, अभय भोसले, सिद्धार्थ कोळगे, निखिल ढेकणे, किशोर आचरेकर, आबा आंबेरकर आदी उपस्थित होते. यावेळी ग्रामस्थ व श्री. सामंत यांच्या प्रयत्नांमुळे हे यश प्राप्त झाल्याचे सरपंच फर्नांडीस यांनी सांगत आभार मानले.