उत्तुंग ध्येय निश्चित करून भविष्य घडवा ः सावंत

71561

उत्तुंग ध्येय निश्चित करून
भविष्य घडवा ः सावंत

भिरवंडेत गुणवंत विद्यार्थ्यांचा गौरव

सकाळ वृत्तसेवा
कणकवली,ता. १८ : दहावी, बारावीमध्ये मिळालेल्या गुणांवर समाधान न मानता आपल्या ज्ञानाच्या कक्षा रूंदावत उत्तुंग ध्येय निश्चित करा. पुढील काळात ज्या शिक्षणातून आर्थिक समृद्धी आणणाऱ्या नोकऱ्या उपलब्ध होतील, असे शिक्षण घ्या आणि आपले उज्वल भवितव्य घडवा. आई-वडीलांनी आपल्यासाठी घेतलेले कष्ट याची जाणीव ठेवत चांगल्या शिक्षणाबरोबरच चारित्र्यवान माणूस बना आणि आपल्या गावाचे व कुटुंबाचे नाव उज्वल करा, असे प्रतिपादन भिरवंडे देवालये संचालक मंडळाचे अध्यक्ष सतीश सावंत यांनी केले.
देवालये संचालक मंडळ, भिरवंडेच्यावतीने गावातील दहावी, बारावीतील उत्तीर्ण आणि विविध परीक्षांमध्ये यश प्राप्त केलेल्या गुणवंत मुलांचा सत्कार नुकताच रामेश्वर मंदिराच्या रंगमंचावर करण्यात आला. कार्यक्रमाच्या अध्यक्षस्थानी देवालये संचालक मडळाचे अध्यक्ष सतीश सावंत होते. यावेळी निवृत्त शिक्षण विस्तार अधिकारी मोहन सावंत, देवालये संचालक मंडळाचे ज्येष्ठ संचालक गणपत सावंत, सचिव तुषार सावंत, संचालक अजित सावंत, सुनील सावंत, संजय सावंत, प्रकाश घाडीगावकर, संदीप सावंत, सुभाष सावंत आदी उपस्थित होते. विद्यार्थ्यांना भेटवस्तू, रक्तचंदनाचे रोप देऊन गौरविण्यात आले. यावेळी ज्येष्ठ मार्गदर्शक मोहन सावंत, गणपत सावंत यांनी विद्यार्थ्यांना मार्गदर्शन केले. अजित सावंत यांनी प्रास्ताविक केले.