तांबेडीच्या ग्रामपंचायतीच्या कारभाराची चौकशी करा

तांबेडीतील चार सदस्यांचे राजीनामे
विनायक राऊतांचे सीईओंना निवेदन ; कारभाराची चौकशी करा
सकाळ वृत्तसेवा
संगमेश्वर, ता. १९ ः तालुक्यातील तांबेडी ग्रामपंचायतीचे सरपंच, ग्रामसेवक यांच्या कारभाराची चौकशी करावी, अशी मागणी माजी खासदार विनायक राऊत यांनी जिल्हा परिषद मुख्य कार्यकारी अधिकारी यांच्याकडे केल्यानंतर ग्रामपंचायतीतील सातपैकी चार सदस्यांनी तडकाफडकी राजीनामे दिले आहेत.
माजी खासदार विनायक राऊत यांनी जिल्हा परिषद मुख्य कार्यकारी अधिकारी यांच्याकडे तांबेडी ग्रामपंचायतीच्या कारभाराची चौकशी करावी अशी मागणी केली होती. येथील स्थानिक ग्रामस्थ अजिंक्य ब्रीद यांनी ग्रामपंचायतीकडे विकासकामांविषयी माहिती मागवली होती. मात्र दिलेली माहिती योग्य नसल्याचे ब्रिद यांचे मत होते. याविषयी गटविकास अधिकाऱ्यांनी कोणतीच दखल न घेतल्यामुळे ब्रीद यांनी माजी खासदारांकडे तक्रार केली होती. त्यानुसार श्री. राऊत यांनी ग्रामपंचायतीच्या कामांची चौकशी करावी अशी मागणी राऊत यांनी मुख्य कार्यकारी अधिकारी यांच्याकडे केली आहे. त्यानंतर तांबेडी ग्रामपंचायतीची विशेष ग्रामसभा झाली. त्यामध्ये तांबेडी ग्रामपंचायतीच्या कारभाराची चौकशी करावी असा ठराव ग्रामस्थानी एकमतांनी मंजूर केला. त्यानंतर ग्रामपंचायतीच्या सात पैकी चार सदस्यांनी तत्काळ राजीनामे दिले.
---