प्रगतीसाठी स्वयंरोजगाराची कास धरा

swt194.jpg
71712
खारेपाटणः स्वयंरोजगार मार्गदर्शन शिबिरात बोलताना प्रकल्प अधिकारी राजेश कांदळगावकर. बाजूला प्राची इस्वलकर, संकिता पाटणकर, श्री. शिंगटे, सुषमा साखरे आदी. (छायाचित्रः एन. पावसकर)

प्रगतीसाठी स्वयंरोजगाराची कास धरा
प्राची इस्वलकरः खारेपाटण येथे शिबिरात शासन योजनांचे धडे
सकाळ वृत्तसेवा
तळेरे, ता. १९ः अनुसूचित जाती प्रवर्गातील गरजवंत बेरोजगार युवक, युवती व महिलांनी सरकारी नोकरीची वाट न पाहता स्वयंरोजगारातून आपली व आपल्या कुटुंबाची प्रगती साधावी, असे उद्गार खारेपाटण सरपंच प्राची इस्वलकर काढले. जिल्हा उद्योग केंद्र सिंधुदुर्ग व महाराष्ट्र शासन उद्योजकता विकास केंद्र तसेच संघमित्रा महिला मंडळ खारेपाटणच्या वतीने आयोजित एकदिवसीय स्वयंरोजगार मार्गदर्शन कार्यशाळेत त्या बोलत होत्या.
संघमित्रा महिला मंडळ खारेपाटणच्या अध्यक्ष संकिता पाटणकर यांच्या अध्यक्षतेखाली बुद्धविहार, पंचशीलनगर खारेपाटण येथे आयोजित या शिबिराचा प्रारंभ खारेपाटण सरपंच प्राची इस्वलकर यांच्या हस्ते डॉ. बाबासाहेब आंबेडकर यांच्या प्रतिमेला पुष्पहार अर्पण करून करण्यात आले. यावेळी जिल्हा उद्योग केंद्राचे प्रकल्प अधिकारी राजेश कांदळगावकर, व्यवस्थापक शिंगटे, समन्वयक सुषमा साखरे, बँकिंग आर्थिक साक्षरता प्रोजेक्टचे सुभाष राणे, खारेपाटण हायस्कूलच्या शिक्षिका काझी, संतोष पाटणकर, बचतगटाच्या सी. आर. पी. आस्था पाटणकर, पंचशील विकास मंडळ खारेपाटणचे सचिव सागर पोमेडकर आदी उपस्थित होते.
मान्यवरांचे स्वागत संघमित्रा महिला मंडळाच्या वतीने पुष्पगुच्छ देऊन करण्यात आले. यावेळी प्रकल्प अधिकारी राजेश कांदळगावकर यांनी जिल्हा उद्योग केंद्र व महाराष्ट्र शासन उद्योजकता विकास केंद्राच्या विविध उद्योग व्यवसाय योजनांची माहिती दिली. मुख्यमंत्री रोजगार निर्मिती कार्यक्रम योजनेविषयी मार्गदर्शन करण्यात आले. या कार्यशाळेचे लाभ घेऊन बेरोजगार युवक, युवतींनी उद्योजक बनावे, असे आवाहन कांदळगावकर यांनी केले.
यावेळी व्यवस्थापक शिंगटे, सुभाष राणे यांनी देखील विविध योजनांची माहिती दिली. या एकदिवसीय शिबिराला खारेपाटण दशक्रोशोतील महिलांसह युवक व युवती मोठ्या संख्येने उपस्थित होत्या. आभार प्रदर्शन संतोष पाटणकर यांनी केले.