समर्थ भंडारी नागरी पतसंस्थेचे ३०० कोटी ठेवींचे लक्ष्य

समर्थ भंडारी पतसंस्थेचे
३०० कोटी ठेवींचे लक्ष्य
प्रभाकर आरेकर ः १४ टक्के लाभांश जाहीर
सकाळ वृत्तसेवा
चिपळूण, ता. १९ : श्री समर्थ भंडारी नागरी पतसंस्थेने ३०० कोटी ठेवींचे लक्ष्य निश्चित केले आहे, अशी माहिती संस्थेचे संस्थापक अध्यक्ष प्रभाकर आरेकर सांगितले.
पतसंस्थेची २३वी वार्षिक सर्वसाधारण सभा आरेकर यांच्या अध्यक्षतेखाली ब्राह्मण सहाय्यक संघ चिपळूणच्या कै. बाबासाहेब बेडेकर सभागृहात झाली. २०२४-२५ या आर्थिक वर्षात भागभांडवलामध्ये ३ कोटी ३ लाख वाढ होऊन संस्थेचे भागभांडवल १२ कोटी ८४ लाख झाले आहे. सध्या संस्थेच्या ठेवी २१९ कोटी ४ लाख रुपये असून, कर्जव्यवहार रुपये १७६ कोटी १८ लाख रुपये आहे. या संस्थेचा एकूण निधी १८ कोटी ६ लाख असून, एकूण गुंतवणूक ८३ कोटी ९४ लाख आहे. संस्थेचा एकूण व्यवसाय रुपये ३९५ कोटी २२ लाख असून, खेळते भांडवल रुपये २७३ कोटी ८२ लाखइतके आहे. संस्थेला या आर्थिक वर्षात रुपये ६ कोटी ८६ लाख निव्वळ नफा झालेला आहे. तसेच ऑडिट वर्ग अ प्राप्त झाला आहे. सभासदांना १४ टक्के लाभांश जाहीर करण्यात आला. सभेत नंदकुमार तांबे, सीताराम शिंदे, रमेश जाधव, किशोर शेट्ये, दत्ताराम सुर्वे, दीपक कदम व विलास नामजोशी यांनी मनोगत व्यक्त केले. या वेळी डॉ. राहुल दंडगे, डॉ. राजीव दंडगे, शिक्षिका रागिणी आरेकर, युपीएससी परीक्षेत यश प्राप्त केलेल्या सिद्धार्थ जैन यांचा सत्कार करण्यात आला.