जिल्ह्यातील ३१ शाळांची दुरुस्ती रखडली

जिल्ह्यात ३१ शाळा इमारतींची दुरुस्ती रखडली
नियोजनमधून साडेतीन कोटी ः १३० शाळांची कामे पूर्ण; ४५ प्रगतिपथावर
सकाळ वृत्तसेवा
रत्नागिरी, ता. १९ ः जिल्हा नियोजनमधून २०२४-२५ या वर्षात शाळा दुरुस्तीसाठी ३ कोटी ६३ लाख रुपयांचा निधी मिळाला होता. विशेष दुरुस्तींतर्गत योजनेतून प्राप्त प्रस्तावानुसार, २०६ पैकी १३० शाळांची कामे पूर्ण झाली आहेत तसेच ४५ शाळांची कामे प्रगतिपथावर असून, ३१ शाळांची कामे सुरू होण्याच्या प्रतिक्षेत आहेत.
जिल्हा परिषदेच्या काही प्राथमिक शाळा आधुनिक तंत्रज्ञानाची कास धरत डिजिटल झाल्या असल्या तरी काही शाळांच्या दुरुस्तीचा प्रश्न उभा आहे. मागील काही महिन्यांपूर्वी केलेल्या सर्वेक्षणानुसार, रत्नागिरी जिल्हा परिषदेच्या ग्रामीण भागातील २११ प्राथमिक शाळांच्या दुरुस्तीची कामे जिल्हा वार्षिक योजना २०२४-२५ मध्ये मंजूर झाली होती. त्या कामांना प्रशासकीय मान्यताही देण्यात आली होती. प्राथमिक शाळांच्या इमारती नादुरुस्त बनल्याने नव्या शैक्षणिक वर्षात शाळेतील विद्यार्थ्यांच्या सुरक्षेच्यादृष्टीने त्या शाळांची दुरुस्तीची कार्यवाही सुरू करण्यात आली आहे. त्या धोकादायक शाळांच्या दुरुस्तीसाठी जिल्हा नियोजन समितीकडून सुमारे साडेतीन कोटी मंजूर कऱण्यात आले होते. नव्या शैक्षणिक वर्षापूर्वीच त्या शाळा दुरुस्त करण्यात येणार असल्याचे सांगण्यात आले होते. कार्यारंभ आदेश दिलेल्या जिल्ह्यातील २०६ शाळांपैकी १३० प्राथमिक शाळांची कामे पूर्ण झाली. ४५ शाळांची कामे प्रगतीपथावर आणि ३१ शाळांची कामे अजून सुरू आहेत. याबाबत प्रथामिक शिक्षणाधिकारी जयदेव कासार म्हणाले, शाळांची काही कामे सुरू होण्यास थोडा विलंब झाला आहे. त्यामुळे ज्या ठिकाणी दुरुस्तीची कामे अद्याप सुरू आहेत तेथील शाळांच्या ठिकाणी स्थानिक पातळीवर शैक्षणिक कामकाजासाठी पर्यायी व्यवस्था करण्यात आली आहे. दुरुस्तीची कामे पूर्ण होताच पुन्हा त्या शाळांमध्ये नियमितपणे शैक्षणिक कामकाजाला सुरवात होईल.

चौकट
शाळा दुरुस्तीची मंजूर आणि प्रशासकीय मान्यता दिलेल्या कामांची संख्या ः
तालुका शाळा
* मंडणगड ४
* दापोली २२
* खेड ६३
* चिपळूण २५
* गुहागर १२
* संगमेश्वर २८
* रत्नागिरी २२
* लांजा ९
* राजापूर २६