योग दिनानिमित्त पाणी व स्वच्छतेचे विविध उपक्रम राबवा

पाणी, स्वच्छतेचे उपक्रम राबवा
वैदेही रानडे ः पर्यावरणीय उपक्रमांचा समावेश
रत्नागिरी, ता. २० ः आंतरराष्ट्रीय योगदिनानिमित्त भारत सरकारच्या आयुष मंत्रालयाच्या मार्गदर्शनाखाली जलजीवन मिशन व स्वच्छ भारत मिशन (ग्रामीण) टप्पा-२ यांच्या समन्वयाने रत्नागिरी जिल्ह्यातील ग्रामीण भागात पाणी व स्वच्छतेचे विविध उपक्रम राबवा, असे आवाहन जिल्हा परिषद मुख्य कार्यकारी अधिकारी वैदेही रानडे यांनी केले आहे.
उद्या (ता. २१) सकाळी ६.३०ला आंतरराष्ट्रीय योगदिन कार्यक्रम जिल्ह्यातील सर्व ग्रामपंचायतीमध्ये ग्रामआरोग्य पोषण पाणीपुरवठा व स्वच्छता समिती किंवा परिसरातील आयुष्मान यांच्या सहकार्याने आयोजित केला आहेत. ग्रामआरोग्य पोषण पाणीपुरवठा व स्वच्छता समित्यांना क्युआर कोड १ स्कॅन करून योग संगमसाठी मानक कार्यप्रणाली माहिती आणि इतर संदर्भ सामुग्री क्युआर कोड २ स्कॅन करून मिळवता येईल.
हरितयोगमध्ये हरितयोग उपक्रम पारंपरिक योगाभ्यासासोबत पर्यावरणीय शाश्वततेलादेखील प्रोत्साहन देण्यात येणार आहे. यावर्षीच्या योगदिनाच्या कार्यक्रमांतर्गत योगसत्रांबरोबरच समुदायाच्या पुढाकारातून राबवण्यात येणाऱ्या पर्यावरणीय उपक्रमांचा समावेश केला जाणार आहे. यावर्षीच्या आंतरराष्ट्रीय योगदिनाच्या कार्यक्रमात वॉश केंद्रित (पाणी, स्वच्छता व आरोग्य) दृष्टिकोन समाविष्ट करण्याचे आवाहन करण्यात आले आहे जेणेकरून योग, आरोग्य व वॉश यांच्यातील संबंध अधोरेखित करता येईल. आंतरराष्ट्रीय योगदिनाच्या कार्यक्रमात सर्व संबंधित घटकांनी सक्रिय सहभाग घेऊन कार्यक्रम यशस्वी करावेत, असे आवाहन प्रकल्प संचालक राहुल देसाई यांनी केले आहे.