बांधकाम कामगारांना मिळणार अत्यावश्यक संच

swt208.jpg
71940
प्रसाद गावडे

बांधकाम कामगारांना
मिळणार अत्यावश्यक संच
प्रसाद गावडेः गणेशोत्सवापूर्वी होणार वितरण
सकाळ वृत्तसेवा
सिंधुदुर्गनगरी, ता. २०ः महाराष्ट्र इमारत व इतर बांधकाम कामगार कल्याण मंडळांतर्गत बांधकाम कामगारांना अत्यावश्यक संच मिळणार आहेत. उद्योग ऊर्जा व कामगार विभागाकडून अत्यावश्यक संच सुधारित योजनेस मान्यता देण्यात आली असून गणेश चतुर्थीपूर्वी याचा लाभ देण्याचे नियोजन करण्यात येत असल्याची माहिती शिवसेना कामगार नेते तथा स्वाभिमानी कामगार संघटनेचे संस्थापक प्रसाद गावडे यांनी दिली.
इमारत व इतर बांधकाम क्षेत्रात काम करणाऱ्या कामगारांच्या कल्याणासाठी तसेच बांधकाम कामगार व त्यांच्या कुटुंबियांच्या आरोग्य व सुरक्षा आणि कल्याणासाठी शासनाकडून अनेक योजनांची अंमलबजावणी केली जात आहे. शासनाकडून कामगारांसाठी यापूर्वी गृहपयोगी वस्तुसंच व सुरक्षा संच योजनेचा लाभ कामगारांना देण्यात आलेला असून आता महायुती सरकारने पात्र नोंदीत बांधकाम कामगारांना अत्यावश्यक संच वितरण योजनेस मान्यता दिली आहे. या अत्यावश्यक संचामध्ये पत्र्याची पेटी, प्लास्टिकची चटई, धान्य साठवण कोठी (क्षमता २५ किलो), धान्य साठवण कोठी, बेडशीट, चादर, ब्लँकेट, साखर ठेवण्यासाठीचा डबा (क्षमता १ किलो), चहा पावडर ठेवण्यासाठीचा डबा (क्षमता ५०० ग्रॅम), वॉटर प्युरिफायर (१८ लिटर) या वस्तूंचा समावेश आहे. लवकरच या संदर्भातील शासन स्तरावर निविदा प्रक्रिया कार्यवाही राबवून गणेशोत्सवापूर्वी कामगार बांधवांना लाभ देण्याचे धोरण शासनाकडून आखण्यात आले आहे. प्रभारी कामगार उपायुक्त, सहाय्यक कामगार आयुक्त, सरकारी कामगार अधिकारी यांनी रिसर्च प्रमाणित केलेल्या पात्र यादीनुसारच वितरण केले जाणार आहे. याशिवाय नव्याने नोंदणीत झालेल्या कामगारांना सुरक्षासंच वितरणास देखील कामगार विभागाने मान्यता दिली असून लवकरच वितरणा संदर्भात पुढील कार्यवाही केली जाणार असल्याची माहिती श्री. गावडे यांनी दिली आहे.
---------------