योगसाधनेतून सुदृढ समाज घडावा

72096

योगसाधनेतून सुदृढ समाज घडावा

गावडेकाका महाराज ः माड्याचीवाडीत ‘रोगानुसार योगा’ कार्यशाळा

सकाळ वृत्तसेवा
कुडाळ, ता. २१ ः ‘रोगानुसार योगा’ या संकल्पनेतून सर्वसामान्य जनतेचे जीवन निरोगी व सुखी बनविण्याचा प्रयत्न करा, असे प्रतिपादन प. पू. श्री गावडेकाका महाराज यांनी माड्याचीवाडी येथे ‘रोगानुसार योगा चिकित्सा’ कार्यशाळेत केले. जिल्ह्यात या माध्यमातून तीनशे योगशिक्षक घडवायचे आहेत, असेही ते म्हणाले.
श्री सदगुरू भक्त सेवा न्यास माड्याचीवाडी यांच्यातर्फे आज जागतिक योगा दिन साजरा करण्यात आला. यानिमित्त डॉ. महादेव गावडे रेकी मास्टर उर्फ श्री श्री १०८ महंत मठाधीश प. पू. सद्गुरू श्री गावडेकाका महाराज यांच्या संकल्पनेनुसार रोगानुसार योगा चिकित्सा कार्यशाळा आयोजित केली होती. गावडेकाका महाराज यांच्या हस्ते उद्‍घाटन झाले.
गावडेकाका महाराज म्हणाले, ‘‘जीवनात योगाचे अनन्यसाधारण महत्त्व आहे. योग एक तपस्या आहे, त्यातून सामाजिक बांधिलकी उभी राहते. कौटुंबिक जिव्हाळा निर्माण होतो. निरोगी आयुष्य निर्माण होते. म्हणून या जागतिक दिनाला महत्त्व आहे. मोबाईल व इंटरनेटच्या माध्यमातून जगाशी जोडलो. मात्र, या माध्यमाचा आपण अतिरेक करतो आहोत. आज सुदृढ व निरोगी जगायचे असेल तर ‘रोगानुसार योगा’ ही संकल्पना राबविणे आवश्‍यक आहे. दहा वर्षांपूर्वी निर्णय घेतला होता की, प्रत्येक गावामध्ये दोन योगशिक्षक निर्माण व्हावेत. संस्थेच्या माध्यमातून दहा योगशिक्षक निर्माण केले आहेत. महाराष्ट्र राज्य मुक्त विद्यापीठ योग अभ्यास केंद्र माड्याचीवाडीच्या माध्यमातून अनेक योग्य शिक्षक घडविले आहेत. सिंधुदुर्गात या माध्यमातून तीनशे योगशिक्षक घडवायचे आहेत, जे समाजाला योगाचे महत्त्व पटवून देतील व समाजातील लोकांचे आरोग्य निरोगी बनवतील.’’
आतंराष्ट्रीय कीर्तीचे योगशिक्षक आनंद सावत यांनी हृदयविकार, मधुमेह, पीसीओडी या आजारांवर योगातून कशी मात करता येऊ शकते, याबाबत प्रत्यक्ष कृतीतून मार्गदर्शन केले. संस्थाध्यक्ष राकेश केसरकर, खजिनदार गौरव मुंज, मुख्य समन्वयक सिद्धेश किनळेकर, राकेश केसरकर, आंतरराष्ट्रीय योगशिक्षक आनंद सावंत, योगशिक्षक दिलीप सुतार, प्रथमेश परब, ऐश्वर्या गडकरी, गिरीधर गावडे उपस्थित होते. राकेश केसरकर यांनी प्रास्ताविक केले. आनंद सावंत यांनी सूत्रसंचालन केले.