चिपळूण-चिपळूणमधून ठाकरे सेनेची मोर्चेबांधणी

चिपळूणमधून ठाकरे सेनेची मोर्चेबांधणी
स्थानिक स्वराज्य संस्था निवडणूक; दोन नेत्यांच्या स्वतंत्र बैठका
सकाळ वृत्तसेवा
चिपळूण, ता. २३ : स्थानिक स्वराज्य संस्थांच्या निवडणुका तोंडावर आहेत. त्या जिंकण्यासाठी ठाकरे गटाच्या शिवसेनेने तयारीला सुरवात केली आहे. माजी खासदार विनायक राऊत आणि गुहागरचे आमदार भास्कर जाधव यांच्या स्वतंत्र बैठका होत आहेत; मात्र दोन्ही नेत्यांनी संघटना बांधण्याची सुरवात चिपळूणमधून केली आहे.
जवळपास तीन वर्षांपासून रखडलेल्या स्थानिक स्वराज्य संस्थांच्या निवडणुका घेण्यासाठी आता प्रशासकीय स्तरावर तयारी सुरू झाली आहे. चिपळूण पालिका आपल्या ताब्यात मिळवण्यासाठी दोन्ही राष्ट्रवादी, दोन्ही शिवसेना आणि भाजपमध्ये प्रचंड स्पर्धा असणार आहे. जिल्हा परिषदेच्या ९ जागा आणि पंचायत समितीच्या अठरा जागांसाठीसुद्धा महाविकास आघाडी आणि महायुतीमध्ये स्पर्धा असणार आहे. त्याच दरम्यान येथील राजकीय पक्षांचीही जमवाजमव सुरू झाली आहे. काँग्रेस, राष्ट्रवादी आणि शिवसेना यांची महाविकास आघाडी होणार की, नाही हे अद्याप निश्चित नाही; मात्र ठाकरे गटाच्या शिवसेनेने निवडणुकीची तयारी सुरू केली आहे. ठाकरे सेनेतील शिवसेनेचे दोन नेते स्वतंत्र निवडणुकीच्या कामाला लागले आहेत.
लोकसभेच्या निवडणुकीत रत्नागिरी-सिंधुदुर्ग लोकसभा मतदार संघाची जागा शिवसेनेकडून भाजपने हिसकावून घेतली. शिवसेनेचे विनायक राऊत यांचा भाजपचे नारायण राणे यांनी पराभव केला. पराभवानंतरसुद्धा राऊत यांचा मतदार संघात संपर्क कायम आहे. ते मतदारांच्या भेटीगाठी घेत असतात. कोकणातील शिवसेनेचे नेते आणि ठाकरे गटाचे एकमेव आमदार भास्कर जाधव यांनी प्रथम आपल्या मतदार संघाच्या बांधणीला सुरवात केली आहे. रविवारी त्यांनी चिपळूणमध्ये मतदार संघातील शिवसेनेच्या शाखाप्रमुख यांचा मेळावा घेतला. तत्पूर्वी राऊत यांनी चिपळूण-संगमेश्वर विधानसभा मतदार संघातील प्रमुख पदाधिकाऱ्यांची बैठक घेतली. जाधवांचे शिबिर चिपळूणमधील बांदल स्कूलच्या सभागृहात झाले तर राऊत यांची बैठक शासकीय विश्रामगृहावर झाली.

चौकट
राऊत-जाधव एकत्र येण्याचे टाळतात का?
काही दिवसांपूर्वी चिपळूणमधील शिवसेनेच्या पदाधिकाऱ्यांचा मेळावा घेण्यात आला. या मेळाव्याला राऊत आणि जाधव दोघे एकत्र येतील, असे वाटले होते; मात्र राऊत यांचा दौरा रद्द झाला आणि जाधव यांनी चिपळूणमधील सेनेच्या पदाधिकाऱ्यांची झडती घेतली. शिवसेनेतील या दोन्ही नेत्यांनी आपल्या पद्धतीने निवडणुकीच्या मोर्चेबांधणीला सुरवात केली आहे; मात्र दोघे एकत्र येण्याचे टाळत आहेत. आगामी काळात तरी हे दोघे नेते एकत्र येतील का, असा प्रश्न आता कार्यकर्त्यांना पडला आहे.

कोट
भास्कर जाधव पक्षाचे नेते आहेत. त्यांनी मतदार संघातील बांधणीला सुरवात केली आहे. आगामी काळात आम्ही दोघे मिळून रत्नागिरी जिल्ह्यात प्रचारासाठी सभा घेऊ. सध्या प्राथमिक स्तरावर चाचपणी सुरू आहे. शिवसेनेला पुन्हा एकदा वैभव मिळवून देणे, हे आमचे दोघांचे उद्दिष्ट आहे. त्यामुळे दोघेही पक्षासाठीच काम करतोय.
- विनायक राऊत, माजी खासदार