सिंधुदुर्गातील बारा प्रकल्प तुडुंब

72539

सिंधुदुर्गातील बारा प्रकल्प तुडुंब

मुसळधारेचा परिणाम; पाण्याचा विसर्ग सुरू

सकाळ वृत्तसेवा
वैभववाडी, ता. २३ ः जिल्ह्यात सुरू असलेल्या जोरदार पावसामुळे यावर्षी जिल्ह्यातील प्रकल्पांमध्ये चांगला पाणीसाठा झाला आहे. जिल्ह्यातील एक मध्यम आणि ११ लघुप्रकल्प १०० टक्के भरले असून, या प्रकल्पातून पाण्याचा विसर्ग सुरू केला आहे.
जिल्ह्यात यावर्षी मेच्या दुसऱ्या आठवड्यापासून दमदार पावसाला सुरुवात झाली. त्यानंतर २१ मे ते २७ मे या कालावधीत जिल्ह्यात मुसळधार पाऊस झाला. या पावसामुळे जिल्ह्यातील नदी-नाले दुथडी मेमध्येच वाहू लागले. त्यामुळे जिल्ह्यातील प्रकल्पांमध्ये पाणीसाठ्यात वाढ होऊ लागली. जिल्ह्यात दोन मोठे, तीन मध्यम आणि ४२ लघु प्रकल्प आहेत. यापैकी काही प्रकल्पांची कामे सुरू असल्याने त्यामध्ये पाणीसाठा करण्यात आलेला नाही. मात्र, उर्वरित प्रकल्पांमध्ये चांगला पाणीसाठा झाल्याचे चित्र आहे.
---
काही प्रकल्पांतील पाणीसाठा असा
कोर्ले सातेंडी मध्यम प्रकल्प १०० टक्के भरला असून, त्यातून पाण्याचा विसर्ग सुरू आहे. शिवडाव, आंबोली, माडखोल, निळेली, सनमटेंब, पुळास, हरकुळ खुर्द, लोरे, ओझरम, हातेरी हे दहा लघुप्रकल्पही १०० टक्के भरले आहेत. देवधर प्रकल्पात ५० टक्के पाणीसाठा झाला. ५० टक्के लघुप्रकल्पांमध्ये ६० टक्केपेक्षा अधिक पाणीसाठा झाला आहे. दोन-तीन दिवसांत यातील अनेक प्रकल्प पूर्ण भरण्याचा अंदाज आहे. जिल्ह्यातील तिलारी जलविद्युत प्रकल्प आणि तिलारी आतंरराज्य प्रकल्प हे दोन्ही मोठे प्रकल्प ३० टक्के भरले आहेत.