वेंगुर्लेत गरजू विद्यार्थ्यांना मदतीचा हात

72607

वेंगुर्लेत गरजू विद्यार्थ्यांना मदतीचा हात

शिक्षक समितीतर्फे ‘दत्तक पालक’अंतर्गत मदत

वेंगुर्ले, ता. २३ ः महाराष्ट्र राज्य प्राथमिक शिक्षक समिती शाखा वेंगुर्ले ही संस्था मागील तीन वर्षे ‘दत्तक पालक’ उपक्रम राबवित आहे. यावर्षी होतकरू, अभ्यासू व आर्थिक परिस्थिती चांगली नसलेल्या तालुक्यातील एकूण ४२ विद्यार्थ्यांना तहसीलदार ओंकार ओतारी यांच्या हस्ते शालेय साहित्य वितरित केले.
येथील साई डिलक्स हॉलमध्ये शनिवारी (ता. २१) झालेल्या या कार्यक्रमाचे उद्‍घाटन शिक्षक समितीचे राज्य महासचिव राजन कोरगावकर यांच्या हस्ते झाले. यावेळी तहसीलदार ओंकार ओतारी, शिक्षक समितीचे जिल्हाध्यक्ष विठ्ठल गवस, सरचिटणीस तुषार आरोसकर, वैभवी कसालकर, शिक्षक नेते सुरेश कदम, तालुकाध्यक्ष प्रसाद जाधव, सामाजिक कार्यकर्ते जयप्रकाश चमणकर, राज्य प्रतिनिधी सचिन मदने, नामदेव जांभवडेकर, नीलम बांदेकर, शंकर वजराटकर, कोकण विभाग सचिव संतोष परब, जिल्हा महिला आघाडी अध्यक्ष निकिता ठाकूर, सिंधुदुर्ग जिल्हा प्राथमिक शिक्षक पतपेढीचे अध्यक्ष चंद्रसेन पाताडे, उपाध्यक्षा ऋतुजा जंगले, शिक्षक पतपेढी वेंगुर्ले संचालक सीताराम लांबर, ज्येष्ठ मार्गदर्शक चंद्रकांत अणावकर, तालुका पत्रकार संघाचे उपाध्यक्ष योगेश तांडेल आदी उपस्थित होते. उपक्रमासाठी तालुक्यातील एकूण ६५ शिक्षकांनी आर्थिक सहकार्य केले.
शिक्षक समितीच्या उपक्रमांबद्दल तहसीलदार ओतारी यांनी गौरवोद्‍गार काढले. वेंगुर्ले शाखेचे कार्य इतर संघटनांसाठी प्रेरणा घेण्यासारखे आहे, असे प्रतिपादन जयप्रकाश चमणकर यांनी केले. कोरगावकर यांनी संघटनेचे महत्त्व विषद केले. प्रसाद जाधव यांनी राज्य प्राथमिक शिक्षक समिती ही शिक्षण व्यवस्थेतील परिवर्तनाची, शिक्षकांच्या न्याय्य हक्कांसाठी आवाज उठविणारी आणि गरजू विद्यार्थ्यांना आधार देणारी एक शक्ती असल्याचे सांगितले. याच कार्यक्रमात नवनियुक्त शिक्षकांना ओळखपत्र वितरण आणि निवृत्त शिक्षक व दहावी-बारावी परीक्षा उत्तीर्ण विद्यार्थ्यांचा सन्मान केला. शिक्षक नेते सीताराम नाईक यांनी प्रास्ताविक केले. भूषण नाईक व प्राजक्ता आपटे यांनी सूत्रसंचालन केले. सचिव रामा पोळजी यांनी आभार मानले.