महावितरणच्या २२ कर्मचाऱ्यांना रेनकोट वाटप

महावितरण कर्मचाऱ्यांना रेनकोट वाटप
अॅड. जमीर खलिफेंची संकल्पना; कर्तव्य बजावताना उपयोग
सकाळ वृत्तसेवा
राजापूर, ता. २४ ः राजापूर तालुक्यातील वीजपुरवठा अखंडितपणे सुरू राहावा याकरिता भरपावसात दिवसरात्र मेहनत करणाऱ्या महावितरणच्या २२ कर्मचाऱ्यांना राजापूरच्या माजी नगराध्यक्ष अॅड. जमीर खलिफे यांच्यातर्फे रेनकोट वाटप करण्यात आले.
राजापूर शहर व तालुक्यात महावितरण कर्मचारी अत्यंत चांगल्या पद्धतीने काम करत आहेत. तालुक्यातील भौगोलिक रचना पाहता वादळी पावसात महावितरणला मोठा फटका बसतो. अनेक ठिकाणी वीजवाहिन्यांवर झाडे पडून खांबही मोडून पडतात. अशावेळी महावितरण कर्मचारी भरपावसात दिवसरात्र मेहनत घेतात आणि वीजपुरवठा सुरळीत करण्यासाठी प्रयत्न करत असतात. त्यातील बहुसंख्य कर्मचारी हे कंत्राटी पद्धतीने अल्प मानधनावर काम करत आहेत. त्यांना सहकार्य म्हणून रेनकोट वाटप करण्याची संकल्पना सामाजिक कार्यकर्ते विनायक कदम यांनी माजी नगराध्यक्ष अॅड. जमीर खलिफे यांच्यापुढे मांडली. त्यानुसार अॅड. खलिफे यांनी तत्काळ महावितरणच्या कर्मचाऱ्यांना रेनकोट भेट दिले. त्यामध्ये राजापूर शहरातील १२ तर तालुक्यातील १० असे एकूण २२ रेनकोट दिले आहेत. अॅड. खलिफे यांच्या हस्ते रेनकोट वाटप केले गेले. या वेळी काँग्रेस शहराध्यक्ष अजीम जैतापकर, महावितरणचे अभियंता जमीर तांबोळी यांच्यासह सर्व कर्मचारी उपस्थित होते.
---