ःघरडा महाविद्यालयात एनबीएची मान्यता

घरडा महाविद्यालयात एनबीएची मान्यता
सकाळ वृत्तसेवा
चिपळूण, ता. २४ ः खेड तालुक्यातील घरडा अभियांत्रीकी महाविद्यालयाच्या (GIT) सिव्हिल अभियांत्रिकी विभागास यावर्षी एनबीएची मान्यता मिळाली. ही मान्यता म्हणजे गुणवत्ताप्राप्त अभियांत्रिकी शिक्षणाचे प्रतीक मानले जाते.
या मान्यतेने विभागाच्या शैक्षणिक शिस्तीला, प्राध्यापकांच्या गुणवत्ता-प्रधान मार्गदर्शनाला आणि विद्यार्थ्यांच्या सर्वांगीण विकासाला अधिकृत मान्यता प्राप्त झाली आहे. यापूर्वीच संस्थेने नॅककडून ए ग्रेड मिळवले होते. आता सिव्हिल विभागासाठी एनबीए मान्यता मिळाल्याने ही वाटचाल अभिमानास्पद ठरली आहे. या विभागात तंत्रज्ञानाची उंची गाठलेले, संशोधन व उद्योगजगतात अनुभवलेले, विविध क्षेत्रातील तज्ज्ञ प्राध्यापकांचे समृद्ध मार्गदर्शन लाभते. शिक्षणाचा उद्देश केवळ पुस्तकापुरता न राहता प्रत्यक्ष अनुभवातून शिकलं पाहिजे, या विश्वासाने विभागाने विविध नामवंत बांधकाम कंपन्यांशी सामंजस्य करार करून विद्यार्थ्यांसाठी इंटर्नशिप व प्रशिक्षणाच्या संधी उपलब्ध केल्या आहेत. जीआयटीमधील सिव्हिल अभियांत्रिकीचे शिक्षण हे केवळ पदवी न मिळवता विद्यार्थ्यांच्या व्यक्तिमत्त्वाचा सर्वांगीण विकास घडवणारे ठरत आहे. येथे सामाजिक जाणीवा जागृत करणारे शिक्षण, व्यक्तीमत्त्व व संवाद कौशल्य विकसित करणारी प्रशिक्षणपद्धती तसेच स्पर्धात्मक जगाशी दोन हात करण्यासाठी सज्ज करणारी शिकवणी दिली जाते. नामांकित कंपन्यामध्ये येथे नोकरीच्या संधीही उपलब्ध आहेत.