६४ टक्के शिधाधारकांना धान्य वितरित

शिधाधारकांना ६४ टक्के धान्य वितरित
खेड पुरवठा विभाग ; ३० जूनपूर्वी लाभार्थींना मिळणार धान्य
सकाळ वृत्तसेवा
खेड, ता. २५ : पावसाळ्यातील नैसर्गिक आपत्तीसह पूरजन्यस्थिती निर्माण होत असल्याने तीन महिन्यांचा शिधा वितरित करण्यात येत आहे. खेड तालुक्यात आतापर्यंत ६४ टक्के शिधापत्रिकाधारक लाभार्थ्यांना धान्य वितरित करण्यात आल्याची माहिती येथील पुरवठा निरीक्षक अमोल देशमुख यांनी दिली.
आपत्कालीन परिस्थितीत लाभार्थी मोफत धान्यापासून वंचित राहू नयेत यासाठी पुरवठा विभागाने आवश्यक ती खबरदारी घेतली आहे. जून, जुलै व ऑगस्ट महिन्यातील अंत्योदय व प्राधान्य कुटुंब लाभार्थी शिधापत्रिकाधारकांना जून महिन्यातच धान्य वितरित करण्यास सुरुवात झाली आहे. येथील तहसीलदार सुधीर सोनावणे यांच्या मार्गदर्शनाखाली त्याचे योग्य पद्धतीने वितरण केले जात आहे. लाभार्थी शिधापत्रिकाधारकांना शहरातील पाच व ग्रामीण भागातील १२५ रास्त धान्य दुकानांच्या माध्यमातून शिधापत्रिकाधारक लाभार्थ्यांना धान्य वितरित केले जात आहे. शिल्लक राहिलेल्या लाभार्थ्यांना जूनअखेरीस धान्य वितरित करण्यात येणार असल्याचे पुरवठा अधिकाऱ्यांनी सांगितले. १९ रोजी आलेल्या पुरामुळे शहरातील पाच रास्तधान्य दुकानांतून धान्य वितरित करताना व्यत्यय आला होता. या लाभार्थ्यांना धान्य वितरित करण्याच्यादृष्टीने त्या त्या रास्त धान्य दुकानदारांना सूचना देण्यात आल्याचे पुरवठा निरीक्षक देशमुख यांनी सांगितले.