-वारकऱ्यांच्या वाहनांसाठी टोलमधुन सूट

वारकऱ्यांच्या वाहनांना टोलमधून सूट
अजित ताम्हणकर ; उपप्रादेशिक परिवहनचे पत्र
सकाळ वृत्तसेवा
रत्नागिरी, ता. २५ : पंढरपूरला १० जुलैपर्यंत जाणाऱ्या व येणाऱ्या वारकऱ्यांच्या हलक्या व जड वाहनांसाठी टोलमधून (पथकर) सूट देण्यात येणार आहे. त्यासाठीचे सवलत प्रवेशपत्र उपप्रादेशिक कार्यालयाकडून जारी करण्यात येणार आहेत. सर्व भाविकांनी व वारकऱ्यांनी यांची नोंद घ्यावी, असे आवाहन सहाय्यक प्रादेशिक परिवहन अधिकारी अजित ताम्हणकर यांनी केले.
आषाढी वारीमधील १० मानाच्या पालख्या ज्या मार्गावरून जातात त्या मार्गावरील सार्वजनिक बांधकाम विभाग, राज्य रस्ते विकास महामंडळ व राष्ट्रीय महामार्ग किंवा राष्ट्रीय महामार्ग प्राधिकरण यांच्या पथकर स्थानकांवर मानाच्या पालख्यांना व वारकरी तसेच भाविकांच्या वाहनांना टोलमधून सूट देण्यात येणार आहे. १८ जून ते १० जुलै या कालावधीत पंढरपूरला जाणाऱ्या व येणाऱ्या वारकऱ्यांच्या हलक्या व जड वाहनांसाठी उपप्रादेशिक परिवहन कार्यालयाकडून त्यांना १८ जून ते १० जुलै या कालावधीसाठी सवलत प्रवेशपत्र जारी करण्यात येणार आहेत. याची सर्व भाविकांनी व वारकऱ्यांनी नोंद घ्यावी, असे ताम्हणकर यांनी सांगितले.