शेठ म. ग. हायस्कूलमध्ये इंग्रजी संभाषण प्रशिक्षण वर्ग

७३००४

शेठ म. ग. हायस्कूलमध्ये
इंग्रजी संभाषण प्रशिक्षण वर्ग

देवगड, ता. २५ ः येथील शेठ म. ग. हायस्कूलमध्ये दीक्षित फाउंडेशन व कुशल ॲकॅडमीच्या संयुक्त विद्यमाने वर्षभर चालणाऱ्या इंग्रजी संभाषण प्रशिक्षण वर्गाला प्रारंभ झाला. विविध मान्यवरांच्या उपस्थितीत या उपक्रमाचे उद्‍घाटन झाले.
व्यासपीठावर दीक्षित फाउंडेशनचे संस्थापक-अध्यक्ष तथा देवगड एज्युकेशन बोर्ड मुंबई संस्थेचे उपाध्यक्ष निरंजन दीक्षित, संस्था उपाध्यक्ष सदानंद पवार, स्थानीय समिती सचिव अ‍ॅड. अविनाश माणगावकर, खजिनदार दत्तात्रय जोशी, सदस्य विलास रूमडे, सदस्या अनुश्री पारकर, सदस्य डॉ. पुष्कर आपटे, प्रभारी मुख्याध्यापिका निशा दहिबावकर, इंग्रजी संभाषण प्रशिक्षण वर्गाचे मार्गदर्शक जयंत मणेरकर आणि वैशाली मणेरकर आदी उपस्थित होते. निरंजन दीक्षित यांनी प्रशिक्षण वर्गाची आवश्यकता सांगून विद्यार्थ्यांना वर्षभर चालणाऱ्या इंग्रजी संभाषण वर्गाचा लाभ घेण्याचे आवाहन केले. अ‍ॅड. माणगावकर यांनी, इंग्रजी प्रशिक्षण वर्गाचे कौतुक करून विद्यार्थ्यांनी याचा लाभ घेऊन इंग्रजी भाषा आत्मसात करण्याचे आवाहन केले. या प्रशिक्षण वर्गाचा लाभ शाळेतील नववीतील ३२ विद्यार्थी घेणार आहेत. हे वर्ग निःशुल्क आहेत. या दोन्ही संस्थांच्या माध्यमातून गत वर्षीपासून सुरू केलेल्या या प्रशिक्षण वर्गाचे कौतुक होत आहे. सौ. मणेरकर आणि जयंत मणेरकर यांनी विद्यार्थ्यांना इंग्रजी संभाषण वर्गाचे स्वरूप, इंग्रजी भाषेची आवश्यकता आणि महत्त्व सांगून शाळेत वर्षभर चालणाऱ्या इंग्रजी संभाषण वर्गाची माहिती व नियोजन विद्यार्थी, पालकांना सांगितले. प्रवीण खडपकर यांनी आभार मानले.