सिंधुदुर्गनगरी येथे रविवारी गुणगौरव

सिंधुदुर्गनगरी येथे
रविवारी गुणगौरव
सावंतवाडी ः निवृत्त बौद्ध अधिकारी कर्मचारी संस्था सिंधुदुर्गतर्फे रविवारी (ता. २९) सिंधुदुर्गनगरी येथील डॉ. बाबासाहेब आंबेडकर सामाजिक न्याय भवन सभागृहात समाजातील विद्यार्थ्यांच्या गुणगौरव कार्यक्रमाचे आयोजन सकाळी साडेदहा वाजता केले आहे. जिल्ह्यातील बौद्ध बांधवांनी निवृत्तीनंतर विधायक कार्य करण्यासाठी या संस्थेची स्थापना केली असून, त्याद्वारे अनेकविध सेवाभावी उपक्रम राबविले जात आहेत. याच उपक्रमांचा एक भाग म्हणून समाजातील गुणवंत विद्यार्थ्यांचा सत्कार कार्यक्रम आयोजित केला आहे. त्यानुसार एसएससी परीक्षेत किमान ७० टक्के व बारावी परीक्षेत किमान ६० टक्के गुण मिळालेल्या तसेच पदवीधर, पदव्युत्तर व विशेष यश संपादन केलेल्या गुणवंत विद्यार्थ्यांचा गुणगौरव समारंभ आयोजित केला आहे. या कार्यक्रमाला गुणवंत विद्यार्थ्यांनी मोठ्या संख्येने उपस्थित राहावे, असे आवाहन संस्थेचे अध्यक्ष सूर्यकांत कदम, सचिव मिलिंद सर्पे व मान्यवरांनी केले आहे.
.........................
कुडाळात १ जुलैला
आरोग्य चिकित्सा
कुडाळ ः माधवबाग कुडाळ क्लिनिक यांच्या वतीने मंगळवारी (ता. १) डॉक्टर्स डेनिमित्त मोफत आरोग्य तपासणी शिबिर सकाळी ९ ते दुपारी २ या वेळेत आयोजित केले आहे. यामध्ये हार्ट रेट, बीपी, उंची, वजन, बीएमआय या जनरल तपासण्या, हृदयविकारासाठी ईसीजी, वॉक टेस्ट, ट्रेडमिल टेस्ट, शुगर तपासणी आणि गरजू रुग्णांना मोफत औषधे दिली जाणार आहेत. यासोबत क्लिनिकमध्ये उपचार घेऊन बरे झालेल्या हृदयविकार, डायबेटीस व बीपीच्या रुग्णांचा सत्कार केला जाणार आहे. या शिबिराचा अधिकाधिक नागरिकांनी उपस्थित राहून लाभ घ्यावा, असे आवाहन करण्यात आले आहे.
.................
कुडाळात रविवारी
‘प्रेरणा परिषद’
कुडाळ ः कुडाळदेशकर गौड ब्राह्मण सहयोग डोंबिवली आणि कुडाळदेशस्थ विद्यावृद्धी समाज यांच्या संयुक्त विद्यमाने ‘प्रेरणा परिषद २०२५’चे आयोजन रविवारी (ता. २९) सकाळी ९ ते १ या वेळेत येथील मराठा समाज हॉल येथे केले आहे. सकाळी ९ वाजता स्वागत आणि प्रास्ताविक, ९.३० वाजता तज्ज्ञ मार्गदर्शक, लेखक आणि व्याख्याते चिन्मय गवाणकर यांची विविध शैक्षणिक विषयांवर कार्यशाळा होणार आहे. साडेअकरा वाजता डॉ. दत्ता सामंत सामाजिक कार्य पुरस्कार २०२५ आणि शिक्षणतज्ज्ञ रामभाऊ परुळेकर व मुख्याध्यापक बाबुराव परुळेकर शैक्षणिक कार्य पुरस्कार २०२५ चा वितरण सोहळा, दुपारी १२.१५ वाजता दहावी, बारावी, पदवी आणि पदव्युत्तर परीक्षेत यशस्वी विद्यार्थ्यांचा कौतुक सोहळा होणार आहे.
......................
प्रसन्न सोनुर्लेकरचे
पदवी परीक्षेत यश
सावंतवाडी ः यशवंतराव चव्हाण महाराष्ट्र मुक्त विद्यापीठातर्फे जून २०२४ मध्ये घेतलेल्या तृतीय वर्ष पदवी परीक्षेत सावंतवाडी येथील आरपीडी ज्युनिअर कॉलेज कॅम्पसमधील डॉ. जे. बी. नाईक आर्टस् अँड कॉमर्स कॉलेज अभ्यासकेंद्राचा प्रसन्न सोनुर्लेकर या विद्यार्थ्याने इतिहास विषयातून विद्यापीठात प्रथम क्रमांक पटकावला. त्याला ३० जूनला नाशिक येथे विद्यापीठाच्या ३६ व्या वर्धापन दिनाचे औचित्य साधून होणाऱ्या समारंभात पारितोषिक देऊन गौरविले जाणार आहे. प्रसन्न याच्या यशाबद्दल संस्थेचे अध्यक्ष विकास सावंत, सचिव व्ही. बी. नाईक, खजिनदार सी. एल. नाईक आदींनी अभिनंदन केले.