सावंतवाडी रुग्णालयातील रखडलेली कामे अखेर मार्गी

73078

रखडलेली कामे अखेर लागली मार्गी

सावंतवाडी रुग्णालय ः स्वच्छतागृह, ड्रेनेजची दुरुस्ती

सकाळ वृत्तसेवा
सावंतवाडी, ता. २५ ः शहरातील उपजिल्हा रुग्णालयातील अनेक वर्षे रखडलेली कामे मार्गी लागली आहेत. जुन्या आणि नव्या इमारतींमधील स्वच्छतागृह व जीर्ण झालेले ड्रेनेज दुरुस्तीचे काम पूर्णत्वास आले असून ते पुनश्च जनतेच्या सेवेत पूर्ववत करण्यात आले आहे.
येथील उपजिल्हा रुग्णालयाच्या ब्रिटिशकालीन इमारतीमधील स्वच्छतागृह व ड्रेनेजची मोठ्या प्रमाणात दुरावस्था झाली होती. त्याची दुरुस्ती करण्यासाठी सात लाख रुपयांच्या निधीची आवश्यकता होती. यासाठी जिल्हा शल्य चिकित्सक डॉ. श्रीपाद पाटील आणि उपजिल्हा रुग्णालयाचे वैद्यकीय अधीक्षक डॉ. ज्ञानेश्वर ऐवळे यांनी सार्वजनिक बांधकाम विभागाच्या अंदाजित खर्चासह जिल्हा नियोजन अधिकारी बुधावले यांच्याकडे मागणीपत्र सादर केले होते. बरीच वर्षे हा प्रश्न रखडला होता. यासाठी आरोग्यमंत्री प्रकाश आबिटकर यांचेही लक्ष वेधले होते. अखेर युवा रक्तदाता संघटनेचे अध्यक्ष देव्या सुर्याजी व सामाजिक बांधिलकी प्रतिष्ठानच्या माध्यमातून शासन दरबारी आग्रही पाठपुरावा करण्यात आला. यानंतर पालकमंत्री नीतेश राणे यांनी रुग्णालयाचे काम पावसाळ्यापूर्वी तातडीने पूर्ण करण्याच्या सूचना दिल्या. सार्वजनिक बांधकाम विभागाचे कार्यकारी अभियंता महेंद्र किणी यांना हे काम त्वरित हाती घेण्याचे आदेश दिले. त्यामुळे स्वच्छतागृहांच्या दुरुस्तीसाठी तत्काळ निधी मंजूर झाला व ठेकेदार सिद्धेश माडखोलकर यांनी याचे काम केले. पहिल्या टप्प्यात स्वच्छतागृह व ड्रेनेज दुरुस्तीचे काम पूर्ण झाले आहे. याची देखरेख करणारा कर्मचारी नीलेश राऊळ यांचा सत्कार रूग्ण कल्याण समितीचे सदस्य तथा युवा रक्तदाता संघटनेचे अध्यक्ष देव्या सुर्याजी यांच्या हस्ते करण्यात आला. यावेळी वैद्यकीय अधीक्षक डॉ. ज्ञानेश्वर ऐवळे, सामाजिक बांधिलकीचे रवी जाधव, मिहिर पडते, ॲड. प्रथमेश प्रभू, प्रसाद गवळी, लक्ष्मण कदम आदी उपस्थित होते. पालकमंत्री राणे यांनी तातडीने निधीला मंजुरी दिली होती. यासाठी विशेष प्रयत्न करणाऱ्या आरोग्यमंत्री आबिटकर व आमदार दीपक केसरकर, जिल्हा बँकेचे अध्यक्ष मनिष दळवी यांचे आभार व्यक्त केले आहेत.