हुलकावणी दिल्याच्या रागातून मोटारचालकासह महिलांना मारहाण

हुलकावणी दिल्याच्या रागातून
मोटारचालकासह महिलांना मारहाण

चिंदरमधील दुचाकीस्वारावर गुन्हा दाखल

सकाळ वृत्तसेवा
आचरा, ता. २५ ः हुलकवणी दिल्याच्या रागातून दुचाकीस्वार व मोटारचालक यांच्यात झालेल्या वादातून दुचाकीस्वाराने चालक आणि मोटारीतील तिघा महिलांना मारहाण केल्याची घटना चिंदर बाजार येथे मंगळवारी (ता.२४) रात्री घडली. या मारहाणीत त्या महिला जखमी झाल्या असून, त्यांना आचरा प्राथमिक आरोग्य केंद्रात प्रथमोपचार केले. मोटार चालकाने दिलेल्या फिर्यादीवरून येथील पोलिसांनी चिंदर बाजार येथील जेरी फॉरेन्स फर्नांडिस (वय ३९) या दुचाकीस्वरावर गुन्हा दाखल केला आहे.
पोलिसांनी दिलेल्या माहितीनुसार, मोटारचालक चैतन्य वसंत सावंत (रा. कोलझर, ता. दोडामार्ग) यांनी येथील पोलिस ठाण्यात फिर्याद दिली. त्यात त्यांनी म्हटले आहे की, मी माझ्या तीन महिला नातेवाइकांसह आचरा-कणकवली मार्गावरुन मोटारीने जात होतो. आम्ही चिंदर बाजार येथे पोहोचलो असता एक दुचाकीस्वार मोटारीमागून येत होता. तो माझ्या मोटारीला ओव्हरटेक करून निघून गेला. मात्र, पुढे जात त्याने दुचाकी वळवली व मोटारीच्या म्हणजे चालकाच्या बाजूने येत मला मोटार थांबवण्याचा इशारा करू लागला. तसेच दुचाकी मोटारीला घासून चालवू लागला. मी मोटार थांबवली असता त्याने खिडकीतून हात घालत माझी कॉलर पकडली व ‘मला हूल देतोस म्हणजे काय’ असे म्हणत शिव्या दिल्या. त्यानंतर मला मोटारीबाहेर खेचत मारहाण केली. माझ्यासोबत असलेल्या महिला नातेवाईक मला सोडवण्यासाठी आल्या असता त्यांनाही त्याने मारहाण केली.
दरम्यान, या घटनेची माहिती मिळताच आचरा पोलिस तुकाराम पडवळ, मिलिंद परब, विशाल वैजल, मनोज पुजारे यांनी घटनास्थळी धाव घेतली. पोलिसांनी मोटार चालकासह जखमी महिलांना येथील आरोग्य केंद्रात दाखल केले. तेथे त्यांच्यावर प्राथमिक उपचार करण्यात आले. त्यानंतर मोटारचालक चैतन्य सावंत यांनी येथील पोलिसांत दिलेल्या फिर्यादीनुसार चिंदर बाजार येथील जेरी फॉरेन्स फर्नांडिस याच्यावर गुन्हा दाखल केला आहे.