रस्त्यावर पडलेले खड्डे, चिखलाचा त्रास

73789
रस्त्यावर पडलेले खड्डे, चिखलाचा त्रास

वेताळबांबर्डेवासीय संतप्त; बांधकाम विभाग धारेवर

सकाळ वृत्तसेवा
कुडाळ, ता. २८ ः हिर्लोक-नारुरकडे जाणाऱ्या मार्गावर वेताळबांबर्डे गावाच्या हद्दीत रस्त्याच्या झालेल्या दुरवस्थेबाबत ग्रामस्थांनी सार्वजनिक बांधकाम विभागाच्या कार्यालयावर धडक देत जाब विचारला. यावेळी वेताळबांबर्डे गावातून जाणाऱ्या मुख्य रस्त्यावर पडलेले खड्डे, साचलेला चिखल आणि पाणी यामुळे नागरिकांना होणारा त्रास बांधकाम विभागाचे मुख्य कार्यकारी अभियंता यांच्याकडे मांडला.
मागील काही वर्षांत वेतोबा मंदिर, अभिनवनगर, कपिलनगर, ब्राह्मणवाडी, पावणाई टेंब, भोगलेवाडी या भागात मार्गावर मोठे खड्डे पडले असून, यामुळे नागरिक त्रस्त झाले आहेत. या खड्ड्यांमुळे वाहनचालकांचे अपघात घडले आहेत. त्यामुळे हा मोठा प्रश्न निर्माण झाल्याचे सांगण्यात आले. रस्त्यावर पाणी साचून राहिल्यामुळे ये-जा करणाऱ्या नागरिकांना त्रास सहन करावा लागत आहे. पुढील आठ दिवसांत मार्गावरील खड्डे बुजवावेत; अन्यथा याप्रश्नी आंदोलन छेडावे लागेल, असा इशारा अभियंता पिसाळ यांना दिला. यावर, ‘बांधकाम’कडून या मार्गाची पाहणी करून पुढील आठ दिवसांत खड्डे बुजविण्यात येतील, असे पिसाळ यांनी वेताळबांबर्डे ग्रामस्थांना आश्वासित केले. यावेळी सरपंच वेदिका दळवी, प्रसाद गावडे, साजुराम नाईक, दशरथ बांबर्डेकर, अवधुत सामंत, विलास बांबर्डेकर, अरविंद बांबर्डेकर, सुस्मिता बांबर्डेकर आदी उपस्थित होते.