बांदा विठ्ठल मंदिरात वीणा सप्ताह

73886

बांदा विठ्ठल मंदिरात वीणा सप्ताह
बांदा ः येथील श्री विठ्ठल मंदिरात प्रतिवर्षीप्रमाणे हरिनाम वीणा सप्ताहाला आज उत्साहात व भक्तिमय वातावरणात प्रारंभ झाला. सप्ताहाचे पारप्रमुख, सेवेकरी व भाविकांच्या उपस्थितीत या सोहळ्याची सुरुवात झाली. सर्वप्रथम वीणा, समई व तबला, पेटी, टाळ आदी सर्व भजनसाहित्य श्री विठ्ठल-रखुमाई चरणी ठेवण्यात आले. त्यानंतर ज्येष्ठ भजनकर्मी गिरीकाका महाजन आणि वीणा सप्ताह नियोजनप्रमुख प्रकाश ऊर्फ भाऊ मिशाळ यांच्या मार्गदर्शनाखाली वीणा व सर्व साहित्याचे पूजन करून गाऱ्हाणे घातले. दुपारी १२ वाजता पहिला पार आळवाडाचे सदस्य प्रीतम हरमलकर, संतोष नाटेकर यांच्याकडे वीणा देण्यात आला. हरिनामाच्या गजरात प्रदक्षिणा करून सप्ताहाची सुरुवात झाली. यावेळी भजन व आरती करून प्रसाद वाटला. मंदिरात सात दिवस विविध धार्मिक कार्यक्रमांचे आयोजन केले आहे. शनिवारी (ता. ५) सप्ताहाची सांगता होणार असून, रविवारी (६) आषाढी एकादशीचा भव्य सोहळा होणार आहे. सप्ताहानिमित्त रोज नामस्मरण, भजन, गजर, सायंआरती, तसेच सायंकाळी ५ ते ६.३० या वेळेत स्थानिक महिलांची भजनसेवा व रात्री १० ते १२ पर्यंत स्थानिक नित्य भजनकर्मींची भजनसेवा होईल.