दाभोसवाडा परिसरात अवतरले प्रतिपंढरपूर

74202

दाभोसवाडा परिसरात
अवतरले प्रतिपंढरपूर
वेंगुर्ले, ता. ३० ः दाभोसवाडा येथील विठ्ठल-रखुमाई मंदिरात सुरू असलेल्या अखंड वीणा सप्ताहाच्या पार्श्वभूमीवर रविवारी (ता. २९) काढण्यात आलेल्या दिंडीने परिसरात प्रतिपंढरपूर अवतरले. दिंडीतील वारकऱ्यांनी केलेल्या ‘ज्ञानोबा तुकाराम’च्या जयघोषाने भक्तिमय वातावरण निर्माण झाले.
दाभोसवाडा येथील विठ्ठल-रखुमाईचा अखंड वीणा सप्ताह २३ जूनपासून सुरू झाला. सप्ताह कालावधीत मंदिरात विविध भजन मंडळांची भजने, तसेच विठ्ठल-रखुमाईची आकर्षक पूजा, पौराणिक कथांवर देखावे असे कार्यक्रम सुरू होते. सप्ताहाच्या सातव्या दिवशी रविवारी सायंकाळी दाभोसवाडा तसेच विठ्ठलवाडी येथील वारकरी मंडळींनी ढोल-ताशांच्या गजरात, फटाक्यांच्या आतषबाजीत आणि ‘ज्ञानोबा तुकाराम’च्या गजरात विठ्ठल मंदिरापर्यंत दिंड्या नेल्या. या दोन्ही दिड्यांमध्ये हौशी युवकांनी पौराणिक कथांवर आधारित वेशभूषा सादर केल्या. दिंडीच्या स्वागतासाठी मार्गावर ठिकठिकाणी आकर्षक रांगोळी व पताकांनी परिसर सुशोभित केला होता. वारकऱ्यांनी भजनासह विठुरायाच्या जयघोषात विविध नृत्यप्रकार सादर केले. दाभोसवाडा येथे अवतरलेले हे प्रतिपंढपूर ‘याची देही, याची डोळा’ पाहण्यासाठी पंचक्रोशीतील नागरिकांनी गर्दी केली होती.