-लाडक्या बहिणींसाठी नागरी सहकारी पतसंस्था

लाडक्या बहिणींसाठी नागरी पतसंस्था
डॉ. सोपान शिंदे ः तालुकास्तरावर पालक अधिकारी नियुक्त
सकाळ वृत्तसेवा
रत्नागिरी, ता. ३ ः महाराष्ट्र शासनातर्फे लाडकी बहीण योजनेंतर्गत ज्या महिलांना आर्थिक साह्य देण्यात येते अशा महिलांची नागरी सहकारी पतसंस्था नोंदणी करण्याबाबत सहकार आयुक्त व निबंधक यांच्याकडून परिपत्रक काढण्यात आले आहे. तसेच लाभार्थी महिलांना याबाबत निकषांची माहिती देण्यासाठी व साह्य करण्यासाठी पालक अधिकारी तसेच साहाय्यक म्हणून नियुक्ती करण्यात आली आहे, अशी माहिती जिल्हा उपनिबंधक डॉ. सोपान शिंदे यांनी दिली.
महिला व बालविकास विभागाच्यावतीने महिलांसाठी मुख्यमंत्री माझी लाडकी बहीण योजना राबवली जात आहे. या योजनेतील जिल्ह्यातील पात्र लाभार्थी महिलांची गाव तालुका व जिल्हा कार्यक्षेत्र असलेली नागरी सहकारी पतसंस्था स्थापन करता येईल. त्या पतसंस्थेत गाव कार्यक्षेत्रासाठी २५० सभासद संख्या व दीड लाख भागभांडवल, नगरपालिका कार्यक्षेत्रासाठी ५०० सभासद संख्या व ५ लाख भागभांडवल, तालुका कार्यक्षेत्रासाठी ५०० सभासद संख्या व ५ लाख भागभांडवल आणि जिल्हा कार्यक्षेत्रासाठी दीड हजार सभासद संख्या व १० लाख भागभांडवल अपेक्षित आहे. महिला सहकारी पतसंस्थेचे सभासद होण्यासाठी महिला व बालविकास विभाग यांनी प्रमाणित केलेल्या यादीत संबंधित महिला लाभार्थीचे नाव समाविष्ट असणे आवश्यक आहे. जिल्ह्यात अशा प्रकारच्या संस्था स्थापन करण्यासाठी मार्गदर्शन व साहाय्य करण्यासाठी पालक अधिकारी म्हणून साहाय्यक निबंधक साहेबराव दत्तात्रय पाटील यांची नियुक्ती केली आहे.