अर्जुना धरणातून कधीही विसर्ग सुरू होईल

-rat५p२४.jpg -
२५N७५४९८
राजापूर ः पाण्याने भरलेले अर्जुना धरण.
-----
अर्जुना धरणातून विसर्गची शक्यता
९७.१२ टक्के पाणीसाठा ; नदीकाठच्या गावांना सतर्कतेच्या सूचना
सकाळ वृत्तसेवा
राजापूर, ता. ५ : गेल्या तीन-चार दिवसांतील संततधारेने तालुक्यातून वाहणाऱ्या अर्जुना नदीवर करक येथे बांधण्यात आलेल्या अर्जुना धरणातील पाणीसाठ्यामध्ये वाढ झाली आहे. दोन दिवसांमध्ये धरणातील पाणीसाठ्यामध्ये सुमारे सात टक्क्यांनी वाढ झाली असून, सद्यःस्थितीमध्ये धरणात ९७.१२ टक्के पाणीसाठा झाला आहे. त्यामुळे धरणातून कधीही पाण्याचा विसर्ग सुरू होऊ शकतो. अर्जुना नदीच्या पाण्यामध्ये वाढ होऊन पूरस्थिती निर्माण होण्याची शक्यता आहे. त्यामुळे नदीकाठावरील गावांमधील लोकांसह शहरवासियांनी अधिक सतर्क राहण्याचे आवाहन तहसीलदार विकास गंबरे यांनी केले आहे.
गेल्या काही दिवसांपासून तालुक्यामध्ये पावसाचा चांगलाच जोर राहिला आहे. त्यामध्ये अर्जुना नदीवर करक येथे पाटबंधारे विभागातर्फे बांधण्यात आलेल्या अर्जुना धरणक्षेत्रामध्येही मोठ्या प्रमाणात पाऊस पडला. पाणीसाठ्यामध्ये कमालीची वाढ झाली आहे. गेल्या दोन दिवसांमध्ये पाणीसाठ्यामध्ये तब्बल ७ टक्क्यांनी वाढ होताना आज ९७.१२ टक्के पाणीसाठा झाल्याची माहिती पाटबंधारे विभागातर्फे देण्यात आली आहे. पावसाचा जोर असाच कायम राहिल्यास आगामी एक-दोन दिवसांमध्ये धरण पूर्णक्षमतेने भरून त्याच्या सांडव्यावरून पाण्याचा विसर्ग होऊ शकतो.

ही गावे नदीकाठची
अर्जुनासह कोदवली नदीच्या पाण्याची धोकापातळी ओलांडण्याची शक्यता लक्षात घेऊन अर्जुना नदीकाठावरील करक, तळवडे, पाचल, रायपाटण, चिखलगाव गोठणेदोनिवडे, शीळ, उन्हाळे, कोळवणखडी, सौंदळ, आडवली, परटवली, बागवेवाडी या गावांमधील लोकांसह राजापूर शहरवासियांना तहसीलदार गंबरे यांनी सतर्क राहण्याचे आवाहन केले आहे.
---
अर्जुना मध्यम प्रकल्प
धरणातील पाणीसाठा ः ९७.१२ %
पर्जन्य ः ७७ मिमी.
२२ मे २०२५ पासूनचे एकूण पर्जन्य ः १९५४ मिमी
उपयुक्त पाणीसाठा ः ७०.४६८ द.ल.घ.मी.