रत्नागिरी - खड्डेमय रस्त्यातून प्रवासाचा हा शेवटचा गणेशोत्सव

रखडलेला मुंबई-गोवा महामार्ग...लोगो

महामार्गाचे ३६४ पैकी २१ किलोमीटरची कामे शिल्लक
उदय सामंत ; खड्डेमय रस्त्यातून प्रवासाचा हा शेवटचा गणेशोत्सव
सकाळ वृत्तसेवा
रत्नागिरी, ता. ०५ : मुंबई-गोवा महामार्गाचा ३६४ पैकी २१ किलोमीटरचा रस्ता शिल्लक आहे. त्यात साडेचार किमीचा डबल लेन रस्ता शिल्लक आहे. खड्डेमय रस्त्यातून प्रवासाचा हा शेवटचा गणेशोत्सव आहे. पुढील वर्षी महामार्ग पूर्ण झालेला असेल. ओव्हरब्रिज व पुलांची कामे मार्च-एप्रिलपर्यंत पूर्ण होतील, असे जिल्ह्याचे पालकमंत्री आणि उद्योगमंत्री उदय सामंत यांनी सांगितले.
रत्नागिरीत पत्रकार परिषदेत सामंत म्हणाले, आपण आठ दिवसांपूर्वी मुंबई-गोवा महामार्गाची पाहणी केली. त्या वेळी अधिकारी आणि ठेकेदारांना काही सूचना केल्या होत्या. शनिवारी चिपळूण येथून रत्नागिरीत येताना केलेल्या सूचनांवर कोणती अंमलबजावणी झाली, याची आपण पाहणी केली. सूचनांप्रमाणे कामाला सुरवात झाली आहे. संगमेश्वर येथे कसबा शास्त्रीपुलाजवळ डोंगराचा भाग धोकादायक झाला होता. त्या ठिकाणी सुरक्षिततेच्या उपाययोजना करण्यास सांगितले होते. त्याचप्रमाणे काही ठिकाणी डिव्हायडरच्यामध्ये माती टाकण्यासाठी रस्त्यावरच माती आणून टाकण्यात आली होती. त्याबाबतही ठेकेदाराला सूचना करण्यात आली आहे.
महामार्गाचे काम जवळपास पूर्ण होत आले आहे. २१ किमीचा मार्ग शिल्लक आहे. त्यातील फक्त साडेचार किमी डबल लेनचे काम राहिले आहे; पण ते पुढील गणपतीच्या आधी पूर्ण होईल. चिपळूण येथील ओव्हरब्रिज एप्रिलपर्यंत, कसबा व संगमेश्वर येथील पुलांची कामे एप्रिल तर बावनदी आणि निवळी ओव्हरब्रिजचे काम मार्चपर्यंत, पाली येथील ओव्हरब्रिज मार्चपर्यंत, लांजा येथील ओव्हरब्रिज एप्रिलपर्यंत पूर्ण होईल, असे मंत्री सामंत यांनी सांगितले.