रत्नागिरी ः रत्नागिरीत आषाढीवारीतून पांडुरंगाचा गजर

75697
75698
75699
75700
------------------
रत्नागिरीत आषाढीवारीतून पांडुरंगाचा गजर
चार हजारांहून अधिक वारकऱ्यांची गर्दी; टाळ, मृदंगाच्या तालावर जयघोष
सकाळ वृत्तसेवा
रत्नागिरी, ता. ६ : आषाढी एकादशीनिमित्त आज सकाळी शक्तिमंदिर मारुती मंदिरापासून भक्तिमंदिर विठ्ठल मंदिरापर्यंत आषाढीवारी उत्साहात काढण्यात आली. सकल हिंदू समाजातर्फे या उपक्रमाचे आयोजन सलग चौथ्या वर्षी करण्यात आले. वारीत जवळपास चार हजारांहून अधिक भाविक, वारकरी सहभागी झाले. माळनाका आणि जयस्तंभ येथे वारकऱ्यांनी मोठे रिंगण केले. मातृभाषा मराठीचा अभिमान, पाकिस्तानविरुद्धच्या युद्धात मिळवलेला विजय यावरही सहभागी वारकऱ्यांनी अभंग, गाणी सादर केली.
मारुती मंदिर येथून वारी सुरू झाली. ही वारी माळनाका, जयस्तंभ, एसटी स्टॅंडमार्गे, राम आळीतून बाजारपेठेतील विठ्ठल मंदिरात पोहोचली. पारंपरिक वेशभूषेत, टाळ-मृदंगांचा गजर करत आणि डोईवर तुळशी वृंदावन घेऊन महिला वारकरी सहभागी होणार झाल्या. विठुरायाची भजने, अभंग, गजर यातून वातावरण भक्तिमय झाले. यांसह मराठी बोला, लिहा, वाचा, मराठी माझी मातृभाषा, मी मराठी महाराष्ट्राचा याचाही गजर करण्यात आला. वारीत पुढे वारकरी दल, त्यामागे तुळशी वृंदावन व पताका घेतलेले दल होते. तसेच अनेक भाविकांनी टाळ घेऊन आले होते. वारी मार्गात रिंगणाच्या ठिकाणी सर्वात बाहेरच्या फेरात पुरुष, मधल्या फेरात माता- भगिनी व सर्वात आत टाळकरी- वारकरी होते. वारी मार्गाने चालताना सर्वांनी शिस्तीचे पालन केले.

कोट
आषाढीवारीमध्ये खूप उत्साहाने सर्व वयोगटाचे विठ्ठल भक्त सहभागी झाले. जातीभेद, लहान थोर, गरीब श्रीमंत सर्व भेद विसरून सगळ्या भक्तांना एकत्र आणणारी ती विठू माऊली आज रत्नागिरीकरांवर विशेष माया धरून होती. कालपर्यंत कोसळणारा पाऊसही त्या माउलीने थांबवून ठेवला.
- अॅड. रुची महाजनी