मत्स्यगंधा एक्स्प्रेसमधून पावणेतीन लाखांचे दागिने पळविले

मत्स्यगंधा एक्स्प्रेसमधून
पावणेतीन लाखांचे दागिने पळविले
खेड ः कोकण रेल्वे मार्गावरून धावणाऱ्या मत्स्यगंधा एक्स्प्रेसमधून प्रवास करणाऱ्या एका महिलेचे २ लाख ८९ हजार ४१० रुपयांचे सोन्याचे दागिने चोरट्याने चोरून नेल्याची घटना शनिवारी (ता. ५) पहाटे २.३० वाजण्याच्या सुमारास खेड रेल्वे स्थानकात घडली. झोपेत असताना ही चोरी केल्याचे तक्रारीत नमूद केले आहे. मत्स्यगंधा एक्स्प्रेसच्या बोगी क्रमांक ५ मधील फिर्यादी महिला झोपल्या होत्या. त्यावेळी चोरट्याने त्यांच्या झोपेचा फायदा घेत बॅगेतील सोन्याचे दागिने चोरून नेले. या प्रकरणी पोलिस ठाण्यात गुन्हा दाखल करण्यात आला आहे.

वाढदिवसाच्या कार्यक्रमावरून राडा
खेड ः तालुक्यातील कुळवंडी-देउळवाडी येथे वाढदिवसाच्या कार्यक्रमावरून जोरदार हाणामारी झाली. यामध्ये दोघेजण जखमी झाले असून खेड पोलिस ठाण्यात दोन परस्परविरोधी तक्रारी दाखल करण्यात आल्या आहेत. या घटनेत रणजित राजाराम निकम आणि गणेश दिलीप निकम जखमी झाले आहेत. पोलिसांनी दिलेल्या माहितीनुसार, गणेश दिलीप निकम यांच्या वडिलांच्या वाढदिवसानिमित्त कुळवंडी येथील शाळा क्र. १ मध्ये वह्या, पेन, पेन्सिल वाटपाचा कार्यक्रम आयोजित करण्यात आला होता. या कार्यक्रमाला उशीर झाल्याने वादाची ठिणगी उडाली. रणजित राजाराम निकम (वय ४०, रा. कुळवंडी, देउळवाडी) यांच्या तक्रारीनुसार, कार्यक्रमाला उशीर झाल्याने त्यांनी शाळेत आक्षेप घेतला होता. घरी परतल्यानंतर गणेश दिलीप निकम (रा. कुळवंडी, लाडवाडी) आणि त्याचा भाऊ रुपेश निकम त्यांच्या अंगणात आले. गणेशने त्यांना शाळेत काय बोलला, असे विचारले असता रणजित यांनी कार्यक्रमाचे आयोजन शाळेच्या वेळेनुसार करायला हवे, होते असे सांगितले. यावर चिडून गणेशने रणजितला धक्का दिला. त्यानंतर वाद उफाळला. रणजितची पत्नी सोडवण्यासाठी आली असता गणेशने त्यांच्याशीही गैरवर्तन केले. रणजित पत्नीला सोडवण्यासाठी गेले असता गणेशने लोखंडी फायटर काढून रणजितच्या डाव्या बाजूला डोक्यावर मारून दुखापत केली. या प्रकरणी खेड पोलिस ठाण्यात परस्परविरोधी तक्रारी दाखल करण्यात आल्या आहेत.