आझाद हिंद सेनेच्या वीरांचा सन्मान

swt634.jpg
75788
दोडामार्गः आझाद हिंद सेनेतील जवानांच्या कुटुंबियांचा सत्कार करताना हळबे महाविद्यालयाचे प्राचार्य डॉ. सुभाष सावंत.

आझाद हिंद सेनेच्या वीरांचा सन्मान
विर्डीतील वारसांशी संवादः हळबे महाविद्यालयाचा पुढाकार
सकाळ वृत्तसेवा
दोडामार्ग, ता. ६ : तालुक्यातील महाराष्ट्र, गोवा व कर्नाटक राज्याच्या सीमेवर डोंगरदऱ्यांत आणि जंगलयुक्त प्रदेशात वसलेल्या विर्डी गावातील तीन जवान सुभाषचंद्र बोस यांच्या आझाद हिंद सेनेत कार्यरत होते. ते आज हयात नसले तरी त्यांच्या कुटुंबियांचा विर्डी गावात जाऊन शोध घेत येथील हळबे महाविद्यालयाने आझाद हिंद सेनेच्या स्थापना दिनानिमित्त त्यांचा सन्मान केला.
सशस्त्र क्रांतीशिवाय भारताला स्वातंत्र्य मिळू शकत नाही, म्हणून सुभाषचंद्र बोस यांनी आझाद हिंद सेनेची स्थापना केली. ‘तुम मुझे खून दो, मै तुम्हे आजादी दूंगा’ असा नारा दिला. त्यांच्या नेतृत्वावर विश्वास ठेवून देशभरातील युवक त्यांच्या सेनेत दाखल झाले होते. दोडामार्ग तालुक्यातील विर्डी येथील अर्जुन महादेव गवस, लाडू गोविंद बांदेकर आणि सुकडो अर्जुन माजिक हे तीन तरुण सुद्धा त्यावेळी आझाद हिंद सेनेत दाखल झाले होते व दुसऱ्या महायुद्धात ब्रिटिशांविरुद्ध लढले होते.
याबाबतची माहिती मिळताच हळबे महाविद्यालयाचे प्राचार्य डॉ. सुभाष सावंत यांनी आपल्या सहकाऱ्यांसह त्या कुटुंबियांचा शोध घेऊन त्यांच्या वारसांची भेट घेतली. तपशीलवार माहिती घेत आझाद हिंद सेनेच्या स्थापना दिनानिमित्त विर्डी येथील सातेरी देवी मंदिरात कार्यक्रम घेऊन त्यांच्या कुटुंबीयांचा सत्कार केला. यावेळी गोव्यातील इतिहास अभ्यासक राजेंद्र केरकर यांनी या गावाचा व त्या वीरांचा इतिहास कथन केला.
या कार्यक्रमाच्या यशस्वीतेसाठी गावातील उपसरपंच एकनाथ गवस, भगवान घाडी यांनी मोलाचे सहकार्य केले. यावेळी पोलिसपाटील, देवस्थान कमिटीचे प्रमुख व गावातील प्रतिष्ठित नागरिक मोठ्या संख्येने उपस्थित होते. कार्यक्रमाच्या अध्यक्षस्थानी प्रभारी प्राचार्य डॉ. सोपान जाधव होते. सांस्कृतिक विभागाच्या वतीने आयोजित या कार्यक्रमाचे प्रास्ताविक व सूत्रसंचालन प्रा. डॉ. प्रज्ञाकुमार गाथाडे यांनी केले. आभार प्रा. दिलीप बर्वे यांनी मानले.