डेगवे मिरेखण परिसरात विद्यार्थ्यांची वारकरी दिंडी

75793

डेगवे मिरेखण परिसरात
विद्यार्थ्यांची वारकरी दिंडी

बांदा, ता. ७ ः जिल्हा परिषद शाळा डेगवे मिरेखण शाळेतर्फे आषाढी एकादशी निमित्त वारकरी दिंडी काढण्यात आली. यात विद्यार्थ्यांनी साकारलेली विठ्ठल-रुक्मिणी वेशभूषेमुळे लक्षवेधी ठरली. दिंडीमुळे डेगवे मिरेखण परिसरात विठ्ठलमय वातावरण निर्माण झाले.
मुख्याध्यापक आनंद कोळापटे यांनी स्वागत केले. विद्यार्थ्यांना वारकरी संप्रदायाचे महत्व कळावे, या उद्देशाने संत व वारकऱ्यांच्या वेशभूषा करून ही दिंडी काढली. विद्यार्थ्यांचा रिंगण सोहळा, फुगड्या आकर्षक ठरल्या. आनंददायी वारी, गणवेश वाटप, दिंडी, अभंगगायन, वृक्षारोपण, अभंग गायनमधील विजेत्यांना बक्षीस वितरण आदी कार्यक्रम झाले. शाळा व्यवस्थापन समिती अध्यक्ष उमेश कोकरे, उपाध्यक्ष राजन सावंत, सदस्य प्रदीप देसाई, मनोज देसाई, अशोक कोकरे, मुख्याध्यापक आनंद कोळपटे, उपशिक्षक सौरभ खोत, अंगणवाडी सेविका विद्या देसाई, मदतनीस अक्षरा सावंत, स्वयंपाकी समीक्षा सावंत आदींनी यासाठी परिश्रम घेतले. मुख्याध्यापक आनंद कोळापटे यांनी सूत्रसंचालन केले. उपशिक्षक सौरभ खोत यांनी आभार मानले.