जयहिंद महाविद्यालयात ‘फ्रेशर्स पार्टी’

75942

जयहिंद महाविद्यालयात ‘फ्रेशर्स पार्टी’

विद्यार्थ्यांसाठी उपक्रम; हॉटेल क्षेत्रासह अभ्यासक्रमाबाबत मार्गदर्शन

सकाळ वृत्तसेवा
सावंतवाडी, ता. ७ ः जय हिंद कॉलेज ऑफ सायन्स (हॉटेल मॅनेजमेंट), साळगाव येथे बी.एस्सी. हॉस्पिटॅलिटी स्टडीज या पदवी अभ्यासक्रमाच्या प्रथम वर्षात प्रवेश घेतलेल्या विद्यार्थ्यांसाठी ‘फ्रेशर्स पार्टी’ उत्साहात झाली. शैक्षणिक वर्ष २०२५-२६ मध्ये प्रवेश घेतलेल्या विद्यार्थ्यांना हॉटेल क्षेत्राची ओळख करून देणे व अभ्यासक्रमाची सविस्तर माहिती देण्याच्या उद्देशाने या कार्यक्रमाचे आयोजन केले होते.
कार्यक्रमास जयहिंद ग्रामोन्नती संस्थेचे खजिनदार शेखर सामंत, लोकमान्य एज्युकेशन कोकण विभागाचे सीनियर एक्झिक्युटिव्ह प्रवीण प्रभूकेळुसकर, शेफ गिरीश फटनाईक, जयहिंद कॉलेजचे प्राचार्य अमेय महाजन, पी.आर.डी. अध्यापक महाविद्यालयाचे प्राचार्य डॉ. मयूर शारभिद्रे प्रमुख पाहुणे म्हणून उपस्थित होते.
यावेळी सामंत म्हणाले, ‘‘विद्यार्थ्यांनी ध्येय आणि चिकाटीने मेहनत घेतली तर या क्षेत्रात मोठ्या प्रमाणात संधी उपलब्ध आहेत. सिंधुदुर्ग जिल्ह्यात पंचतारांकित हॉटेल्स सुरू होत आहेत. भविष्यात पर्यटन उद्योगाची वाढ होईल. त्यामुळे केवळ नोकरीच नव्हे तर, स्वतःचा व्यवसाय उभा करण्याची संधी देखील विद्यार्थ्यांना मिळेल.’’
प्रभूकेळुसकर यांनी राष्ट्रीय शैक्षणिक धोरणात कौशल्याधारित शिक्षणाला दिलेले महत्त्व स्पष्ट केले. विद्यार्थ्यांना प्रात्यक्षिक ज्ञान देऊन त्यांना सक्षम बनविणे हे आमचे प्रमुख ध्येय आहे. महाविद्यालयात प्रवेश घेतलेला एकही विद्यार्थी नोकरीशिवाय राहणार नाही, ही आमची जबाबदारी असेल, अशी हमी दिली. प्रा. महाजन व प्रा. डॉ. शारभिद्रे यांनी देखील विद्यार्थ्यांना भावी वाटचालीसाठी शुभेच्छा दिल्या. प्रा. ऋषिकेश सूर्याजी यांनी प्रास्ताविक केले. प्रा. हर्षद धुरी यांनी सूत्रसंचालन केले. प्रा. मनाली सावंत यांनी आभार मानले. तृतीय व द्वितीय वर्षाच्या विद्यार्थ्यांनी रंगारंग सांस्कृतिक कार्यक्रम सादर करून नव्या विद्यार्थ्यांचे स्वागत केले.