विद्यार्थ्यांच्या प्रगतीसाठी निपुण भारत आवश्यक

विद्यार्थ्यांच्या प्रगतीसाठी
निपुण भारत आवश्यक
पाली ः निपुण भारतअंतर्गत अध्ययनस्तर, वाचन, लेखन, संख्याज्ञान व प्रत्येक इयत्तेच्या अध्ययनस्तरानुसार विद्यार्थी प्रगत होतील. त्यासाठी शिक्षकांनी जास्तीत जास्त प्रयत्न करणे आवश्यक आहेत. त्याचबरोबर निपुण महाराष्ट्र कृती आराखड्यात दुसरी ते पाचवीतील १०० टक्के विद्यार्थी संख्या आवश्यक आहे, असे प्रतिपादन खानू केंद्रप्रमुख गोविंद तारवे यांनी केले. खानू येथील सरस्वती विद्यामंदिरात खानू केंद्राची केंद्रस्तरीय शिक्षण परिषद झाली. या वेळी जिल्हा समन्वयक राहुल मिसाळ, खानू केंद्र मुख्याध्यापिका स्मिता जाधव, शिक्षक मनोजकुमार खानविलकर, दत्तात्रय दर्डी आदी उपस्थित होते. यंदाच्या शैक्षणिक वर्षामध्ये शिक्षकांना अध्यापनासाठी नवीन उभारी मिळावी तसेच मार्गदर्शन व्हावे त्याचबरोबर शासनाची नवीन धोरणे अवगत व्हावी. निपुण भारतअंतर्गत शाळांची सद्यस्थिती काय आहे व त्या दृष्टीने कशी तयारी करावयाची आहे, त्याचा विचारविनिमय करून मार्गदर्शन करण्यात आले.
-----
सावर्डे येथे
पोवाड्यांचे सादरीकरण
सावर्डे ः लोककला ही केवळ मनोरंजनाचे साधन नसून, ती सामाजिक परिवर्तनाचे प्रभावी माध्यम आहे, असे कौतुगोद्गार सावर्डे कला महाविद्यालयाचे प्राचार्य टी. वाय. कांबळे यांनी मुंबई कलापथकातील कलाविष्काराबाबत काढले. महाविद्यालयाच्या मराठी विभाग व इतिहास आयक्युइसीच्यावतीने आयोजित शाहिरी लोककला कार्यक्रमात ते बोलत होते. महाविद्यालयात मुंबई कलापथकातील कलाकारांनी पारंपरिक पोवाड्यांच्या माध्यमातून सावित्रीबाई फुले यांचे स्त्री शिक्षणासाठीचे योगदान, महात्मा फुले यांचे स्त्री उद्धारासाठीचे कार्य तसेच झाडपूजा आणि पर्यावरणसंवर्धनाची संस्कृती या विषयांवर प्रभावी सादरीकरण केले. ‘स्त्री जातीच्या मुक्तीसाठी आले महात्मा फुले, त्यांनी मुलीचे शिक्षण केले खुले, जैतापूराच्या नावानं अणुऊर्जाचा घाट, राजा आला कोल्हापुराचा अशी विविध गाणी आणि पोवाडा सादर केले. पोवाड्यातून सांस्कृतिक अभिव्यक्ती व सामाजिक संदेशही ठळकपणे मांडण्यात आला.
------
घरडामध्ये ‘इटीसी’चा
९४.७३ टक्के निकाल
चिपळूण ः खेड तालुक्यातील घरडा अभियांत्रिकी महाविद्यालयाताली इलेक्ट्रॉनिक्स अॅण्ड टेलिकम्युनिकेशन (इटीसी) विभागाचा मुंबई विद्यापिठाचा निकाल नुकताच जाहीर झाला आहे. या विभागाचा निकाल ९४.७३ टक्के लागला आहे. या विभागातून स्वप्नील घाणेकर याने ८.६९ ग्रेड मिळवून महाविद्यालयात प्रथम येण्याचा मान मिळवला तर ८.४८ ग्रेड मिळवून केशव प्रभू याने द्वितीय, यश घाग याने ८.१३ ग्रेड मिळवून तृतीय क्रमांक मिळवला. उत्तीर्ण झालेल्या सर्व विद्यार्थ्याचे विभागप्रमुख डॉ. सचिन खेडेकर, प्राचार्य डॉ. प्रमोद पाटील, उपप्राचार्य डॉ. सचिन पाटील, रजिस्ट्रार प्रा. संदिप मुग्न्घाटे, शिक्षक व शिक्षकेत्तर कर्मचारी यांनी अभिनंदन केले.
-------