दापोली -मुरुड किनाऱ्यावरील त्या बांधकामावर कारवाई करा

मुरूड किनाऱ्यावरील त्या बांधकामावर कारवाई करा
अजय शिरवणेकर; १७ जुलैला उपोषणाचा इशारा
दापोली, ता. ७ ः तालुक्यातील मुरूड येथील शासकीय जागेत समुद्रकिनारी केलेल्या अनधिकृत बांधकामाबाबत कोणतीही कारवाई न केल्यामुळे सामाजिक कार्यकर्ते अजय शिरवणेकर यांनी १७ जुलैला उपोषण करणार असल्याचा इशारा प्रशासनाला दिला आहे. त्यामुळे दापोलीत सीआरझेडवरून पुन्हा वाद उफाळणार आहे.
कोकणाला ७८० किलोमीटर समुद्रकिनारा लाभलेला असून, मुरूड किनारा हा पर्यटकांसाठी आकर्षणाचा विषय ठरलेला आहे. या किनारी सीआरझेडचे उल्लंघन करून केलेल्या बांधकामाविरोधात शिरवणेकर यांनी दापोली तहसील कार्यालयासमोर उपोषण करणार असल्याचे पत्र दापोली तहसीलदार, प्रांताधिकारी, प्रदूषण नियंत्रण मंडळ चिपळूण यांना दिले आहे. सीआरझेडचे उल्लंघन करून शासकीय जागेत केलेल्या अनधिकृत बांधकाम करणाऱ्यांवर गुन्हे दाखल करावेत अन्यथा तहसील कार्यालयासमोर उपोषण करावे लागेल. मुरूड येथील ज्या जागेवर अनधिकृत बांधकाम केले आहे ती जागा समुद्राच्या भरतीरेषेपासून १ ते २०० मीटर अंतरात आहे. सीआरझेड अविकसित क्षेत्रात अनधिकृत बांधकाम करण्यात आल्याचे अहवालातूनही स्पष्ट होते. त्या बांधकामावर कारवाई करावी, अशी मागणी केल्याचे शिरवणेकर यांनी सांगितले.