रत्नागिरी ः सहकार पॅनलचा १६ जागांवर दणदणीत विजय

rat7p2.jpg-
75900
रत्नागिरी ः जिल्हा सहकारी बोर्डाच्या निवडणुकीत यशस्वी सहकार पॅनेलचे उमेदवार.
-------------
सहकार पॅनेलचा १६ जागांवर दणदणीत विजय
जिल्हा सहकारी बोर्ड; १४ उमेदवार बिनविरोध, चर्चेनंतर ठाकरे शिवसेनेची माघार
सकाळ वृत्तसेवा
रत्नागिरी, ता. ७ : रत्नागिरी जिल्हा सहकारी बोर्डाच्या पंचवार्षिक निवडणुकीत ‘सहकार पॅनेल’ने १७ पैकी १६ जागा जिंकत दणदणीत विजय संपादन केला आहे. जिल्हा बँकेचे अध्यक्ष डॉ. तानाजीराव चोरगे आणि जिल्हा सहकारी बोर्डाचे विद्यमान अध्यक्ष प्रभाकर शेट्ये यांच्या मार्गदर्शनाखाली सहकार पॅनेलने ही निवडणूक लढवली होती.
जिल्हा सहकारी बोर्डाच्या निवडणुकीत यंदा उद्धव बाळासाहेब ठाकरे (उबाठा) गटाकडून सहकार पॅनेलविरोधात उमेदवार उभे केले होते; मात्र जिल्हा बँकेचे अध्यक्ष डॉ. तानाजीराव चोरगे, लांजा - राजापूरचे आमदार किरण सामंत आणि माजी खासदार विनायक राऊत यांच्यात झालेल्या चर्चेनंतर अखेरच्या दिवशी उबाठा पक्षाने आपले सर्व उमेदवार मागे घेतले. त्यामुळे सहकार पॅनेलचे १४ उमेदवार बिनविरोध निवडून आले. त्यात रामचंद्र गराटे, प्रभाकर शेट्ये, चंद्रकांत परवडी, रमेश दळवी, अविनाश जाधव, सिराज घारे, सुनील टेरवकर, प्रताप सावंत, प्रसन्न दामले, सुरेंद्र लाड, मनोज कदम, हेमंत वणजू, स्मिता दळवी आणि प्राची टिळेकर यांचा समावेश होता. तरीही अखेरच्या दिवशीही सहकार पॅनेलविरोधात तीन उमेदवारांनी आपली उमेदवारी कायम ठेवली होती. त्यामुळे ५ जुलै २०२५ रोजी उर्वरित तीन जागांसाठी मतदान प्रक्रिया पार पडली. सकाळी ८ ते दुपारी ४ वाजेपर्यंत मतदान झाल्यावर लगेच मतमोजणी होऊन निकाल जाहीर करण्यात आला. जिल्हाभरातील मतदारांनी मोठ्या उत्साहात रत्नागिरीत येऊन मतदानाचा हक्क बजावला. या तीन जागांपैकी सहकार पॅनेलचे नितीन कांबळे आणि सीताराम लांबोरे यांनी मोठ्या मताधिक्याने विजय मिळवला. या दणदणीत विजयानंतर विजयी उमेदवारांचे पालकमंत्री उदय सामंत आणि जिल्हा बँकेचे उपाध्यक्ष बाबाजी जाधव यांनी अभिनंदन केले. या संपूर्ण निवडणुकीत आमदार शेखर निकम आणि दापोली अर्बन बँकेचे जयवंत जालगावकर यांचेही मोलाचे सहकार्य लाभल्याचे सहकार पॅनेलकडून सांगण्यात आले. या विजयामुळे रत्नागिरीच्या सहकार क्षेत्रावर सहकार पॅनेलचे निर्विवाद वर्चस्व पुन्हा एकदा सिद्ध झाले आहे.