चिपळूण - प्रभात रोडची चाळण

rat7p8.jpg -
75957
चिपळूण : प्रभातरोड रस्त्याची झालेली दुरवस्था.
---------
चिपळूणमधील प्रभातरोडची दुरवस्था
नागरिकांकडून तीव्र नाराजी; खड्ड्यांमुळे अपघाताचा धोका
सकाळ वृत्तसेवा
चिपळूण, ता. ७ ः मुंबई-गोवा महामार्गापासून ते नारायण तलावाकडे जाणाऱ्या चिपळूण शहरातील प्रभातरोडची सध्या चाळण झाली आहे. हा रस्ता पूर्णपणे उखडला असून, खड्डे चिखलपाण्याने भरून गेलेले आहेत. येथून जाणाऱ्या प्रत्येकाला रस्त्यात खड्डा की, खड्ड्यात रस्ता हाच प्रश्न पडलेला आहे. सुमारे ४०० मीटर एवढ्या रस्त्याचे डांबरीकरण यावर्षी न झाल्यामुळे येथील नागरिकांकडून तीव्र नाराजी व्यक्त केली जात आहे.
पावसाळ्यात खड्ड्यात चिखल व पाणी तर पावसाळा गेला की, धुळीचा त्रास येथील नागरिकांना सहन करावा लागतो. चिपळूण नगरपालिकेने विकसित केलेले नारायण तलाव याच भागात आहे. तेथे जाण्यासाठी याच रस्त्याचा उपयोग होतो. शहरातील नागरिक सकाळ-संध्याकाळी या तलावावर येत असतात. त्यांना रस्त्यावर पडलेल्या खड्ड्यांचा त्रास सहन करावा लागत आहे. प्रभातरोड रस्त्यावरून रॉयल नगरकडे जाता येते. रॉयल नगर परिसरात १५० कुटुंबे राहतात. माजी आमदार रमेश कदम यांच्या घरासमोरचा रस्ता नादुरुस्त झाला आहे. पावसाळ्यापूर्वी पालिकेने या भागातील रस्त्याची बाजूपट्टी भरून घेतली होती. त्या रस्त्याची तातडीने दुरुस्ती व्हावी, अशी मागणी नागरिकांकडून केली जात आहे.

कोट
पावसाळ्यात खड्डे भरणे शक्य नाही; मात्र मोठ्या खड्ड्यात पाणी साचत असल्यामुळे खड्ड्यांचा अंदाज येत नाही. त्यात दुचाकी आणि चारचाकी आदळतात. रिक्षा व्यावसायिकांनाही त्रास होतो. त्यामुळे खड्ड्यातील पाणी काढण्याचे नियोजन पालिकेने करावे म्हणजे अपघात टाळता येईल.
- आरिफ तांबे, रॉयल नगर चिपळूण