मोहरम

लांज्यात मोहरम मिरवणूक शांततेत
सकाळ वृत्तसेवा
लांजा, ता. ७ ः राष्ट्रीय एकात्मतेचे प्रतीक असलेला मोहरम ताजिया मिरवणूक लांजात रविवारी (ता. ६) शांततेत काढण्यात आली. मुस्लिम बांधवांच्या पवित्र मोहरम उत्सवानिमित्त शरातून ढोल-ताशांच्या गजरात ताजियाची सवाद्य मिरवणूक काढण्यात आली. शहरात हिंदू-मुस्लिम ऐक्याची परंपरा लाभलेल्या या मिरवणूकीत दरवर्षी प्रमाणे शहरातील हिंदू बांधव ही सहभागी झाले होते. मिरवणुकीत शहरातील मुस्लिम बांधवांनी मोठ्या प्रमाणावर सहभाग घेतला. मिरवणूकीला शहरातील हजरत सय्यद चाँदशहा बुखारी दर्गामधून दुपारी चार वाजता प्रारंभ झाला. बाजारपेठेतील जुना बस स्टॉप, हनुमान मंदिर, जुनी बाजारपेठ वसाहत, पौलसतेश्वर मंदिर येथील तळ्याजवळून चव्हाटा मंदिर, जामा मशिद या मार्गावरुन पुन्हा दर्गामध्ये संध्याकाळी सात वाजता ताजिया मिरवणुकीची सांगता झाली. या मिरवणुकीत कोणताही अनुचित प्रकार घडू नये म्हणून चोख पोलीस बंदोबस्त ठेवण्यात आला होता.