कणकवलीत रविवारी विद्यार्थी गुणगौरव

कणकवलीत रविवारी
विद्यार्थी गुणगौरव
कणकवली ः क्षत्रिय मराठा घाडीगावकर सेवा समाज, मुंबईच्या सिंधुदुर्ग विभागाने गुणवंत विद्यार्थी सत्कार समारंभ रविवारी (ता. १३) सकाळी १० वाजता येथील मातोश्री हॉल येथे आयोजित केला आहे. समाजातील दहावी परीक्षेत ७५ टक्के, बारावीत ६० टक्के पेक्षा जास्त गुण, इतर उच्च शिक्षण, पदवीधर, पदविका, शिष्यवृत्ती, क्रीडा क्षेत्रात यश मिळालेल्या विद्यार्थ्यांनी अध्यक्ष सूर्यकांत घाडीगावकर, प्रदीप घाडी यांच्याशी ११ जुलैपर्यंत संपर्क साधावा, असे आवाहन केले आहे.
........................
मालवण-वायरीत
संगीत भजन स्पर्धा
मालवण ः मालवण-वायरी येथील श्री देव स्वयंभू भूतनाथ मंदिरात श्रावणी सोमवारनिमित्त २८ जुलै व ४, ११, १८ ऑगस्टला जिल्हास्तरीय भारुडासह संगीत भजन स्पर्धा आयोजित केली आहे. या स्पर्धेत प्रथम क्रमांक रोख १२ हजार, द्वितीय ८००१, तृतीय ६००१, चतुर्थ ५००१, उत्तेजनार्थ प्रथम ४००१, उत्तेजनार्थ द्वितीय ३५०१, उत्तेजतार्थ तृतीय ३००१ तसेच वैयक्तिक गायक, पखवाज, हार्मोनियम, तबला, झांज, कोरस अशी बक्षिसे देण्यात येणार आहेत. अधिक माहितीसाठी गजानन बोडवे, मंदार बोडवे यांच्याशी संपर्क साधावा.
.........................
वेंगुर्ले वाचनालयास
२० हजारांची देणगी
वेंगुर्ले ः शहरातील श्रीनिवास जनरल स्टोअर्सचे मालक सखाराम उर्फ श्रीनिवास सौदागर यांनी नगरवाचनालय वेंगुर्ले या संस्थेला २०,००० रुपयांची देणगी दिली. या देणगीतून २०२५-२६ पासून पूर्ण प्राथमिक शाळा वेंगुर्ले क्र. १ मधून पहिली ते सातवी वर्गातून प्रथम येणाऱ्या विद्यार्थ्यांना रोख पारितोषिके देऊन गौरविण्यात येणार आहे. श्रीनिवास सौदागर यांनी दिलेल्या देणगीबद्दल संस्थेचे कार्याध्यक्ष अनिल सौदागर व कार्यवाह कैवल्य पवार यांनी आभार व्यक्त केले.
........................
दिव्यांग लाभार्थ्यांना
निधीसाठी आवाहन
कुडाळ ः कुडाळ नगरपंचायत हद्दीतील दिव्यांगांची नोंदणी केली असून नगरपंचायतीमार्फत नोंदणीकृत दिव्यांग पात्र लाभार्थ्यांना व्यवसाय करण्यासाठी निधी उपलब्ध करण्यात येणार आहे. कुडाळ नगरपंचायतीतर्फे या योजनेकरिता विहित नमुन्यातील अर्ज मागविण्यात येत आहेत. पात्र लाभार्थ्यांनी नगरपंचायतीत ४ सप्टेंबरपर्यंत आवश्यक कागदपत्रांसह अर्ज सादर करावेत, असे आवाहन केले आहे.