निराधार महिलांना कुडाळात अनुदान

निराधार महिलांना
कुडाळात अनुदान
कुडाळ ः कुडाळ नगरपंचायतीने शहरातील ६५ निराधार महिलांना अनुदान वाटप केले. नगरपंचायतीच्या सर्वसाधारण सभेमध्ये नगराध्यक्ष प्राजक्ता बांदेकर यांनी तत्काळ अनुदान वाटप करण्याच्या सूचना दिल्या होत्या, अशी माहिती महिला व बालकल्याण समिती सदस्य चांदणी कांबळी यांनी दिली. कुडाळ नगरपंचायतीच्या महिला व बालकल्याण विभागातर्फे शहरातील विधवा, निराधार महिलांना व्यवसायासाठी अनुदान दिले जाते. यावेळी अनुदान देण्यामध्ये विलंब झाल्याने नगराध्यक्ष बांदेकर यांनी सर्वसाधारण सभेमध्ये अनुदान तत्काळ देण्याच्या सूचना दिल्या होत्या. त्यानुसार शहरातील ६५ विधवा निराधार महिलांना व्यवसायासाठी त्यांच्या बँक खात्यात अनुदान जमा करण्यात आले असल्याची कांबळी यांनी दिली.

सावंतवाडीत रविवारी
कॅरम, बुद्धिबळाचे धडे
सावंतवाडी ः मुक्ताई ॲकॅडमीतर्फे शालेय व महाविद्यालयीन विद्यार्थ्यांसाठी कॅरम आणि बुद्धिबळ मार्गदर्शन कार्यशाळेचे आयोजन केले आहे. पुढील महिन्यात होणाऱ्या शालेय स्पर्धेच्या आणि ॲकॅडमीच्या स्पर्धेच्या तयारीसाठी ही कार्यशाळा घेण्यात येत आहे. सावंतवाडी येथील श्री पंचम खेमराज महाविद्यालयाच्या हॉलमध्ये रविवारी (ता. १३) सकाळी ९.३० ते दुपारी १.३० या वेळेत कार्यशाळा घेण्यात येईल. यात कौस्तुभ पेडणेकर कॅरमचे आणि राष्ट्रीय बुद्धिबळ खेळाडू बाळकृष्ण पेडणेकर बुद्धिबळचे मार्गदर्शन करणार आहेत. नावनोंदणी व अधिक माहितीसाठी कौस्तुभ पेडणेकर यांच्याकडे संपर्क करावा. सहभाग घेणाऱ्या विद्यार्थ्यांना प्रशस्तिपत्र देण्यात येईल. विद्यार्थ्यांनी या कार्यशाळेत सहभागी होण्याचे आवाहन पेडणेकरांनी केले आहे.

सांगेली येथे बैलाच्या
हल्ल्यात महिला जखमी
सावंतवाडी ः शेतात चरण्यासाठी सोडलेल्या बैलाने अचानक हल्ला केल्याने सांगेली-गुरगुटवाडी येथील महिला शेतकरी जखमी झाली. ही घटना रविवारी (ता. ६) सायंकाळी घडली. अनिता अरुण रेडीज (वय ४८) असे जखमी महिलेचे नाव आहे. या हल्ल्यात ती गंभीर जखमी झाली. तत्काळ ग्रामस्थांनी उपचारासाठी रुग्णालयात दाखल केले. सावंतवाडी उपजिल्हा रुग्णालयात उपचार सुरू आहेत.