गणेश विसर्जन घाटाची व्यवस्था न झाल्यास आंदोलन

विसर्जन घाटाची व्यवस्था
न झाल्यास आंदोलन
चिपळूण, ता. ८ ः बहादूरशेखनाका येथील वाशिष्ठी पुलाजवळ गणपती विसर्जन करण्याची कोणतीही सुविधा उपलब्ध नाही. गेली दोन वर्षे ही सुविधा उपलब्ध करून देण्याचे आश्वासन सातत्याने देण्यात आले; मात्र यावर्षी प्रशासनाने योग्य ती व्यवस्था न केल्यास आम्ही आंदोलन करू, असा इशारा चिपळूण पंचायत समितीचे माजी सभापती शौकत मुकादम यांनी दिला आहे.
बहादूरशेख आणि कळंबस्तेजवळील जुने दोन पूल तोडण्यात आल्यामुळे नव्याने बांधलेल्या पुलाजवळ जाण्यासाठी कोणताही रस्ता उपलब्ध नसल्याचे त्यांनी निदर्शनास आणून दिले आहे. या ठिकाणी ओझरवाडी, मवतवाडी, मोकंबवाडी, गांधीनगर, कळंबस्ते येथील आदी परिसरातील हजारो नागरिक गणेश विसर्जनासाठी येत असतात. या भागात विसर्जनासाठी योग्य ठिकाण निश्चित करून विसर्जन घाट बांधण्याची मागणी गेल्या दोन महिन्यांपूर्वीच प्रशासनाकडे लेखी स्वरूपात केली होती; मात्र अद्याप कोणत्याही अधिकाऱ्यांनी या ठिकाणी पाहणी करून नियोजन किंवा उपाययोजना केलेली नाही, असा आरोपही त्यांनी केला. २५ ते ३० दिवसात विसर्जन घाटाच्या बांधकामास सुरवात झाली नाही तर आम्ही सर्वपक्षीय आंदोलन छेडू, असा इशारा मुकादम यांनी दिला आहे. त्याबाबतचा लेखी पत्रव्यवहार त्यांनी मुंबई-गोवा महामार्ग विभाग, पोलिस प्रशासन, उपविभागीय अधिकारी आणि मुख्याधिकाऱ्यांना केला आहे.