सावंतवाडीत हिंदू-मुस्लिम एकीचे दर्शन

76036

सावंतवाडीत हिंदू-मुस्लिम एकीचे दर्शन

ताबूत फेरी उत्साहात; ‘मराठ्यांचा पीर’ची भवानी देवीला भेट

सकाळ वृत्तसेवा
सावंतवाडी, ता. ७ ः शहरात मोहरम निमित्त मुस्लिम बांधवांतर्फे ताबूत फेरी काढण्यात आली. याच मोहरम महिन्यात हजरत मोहम्मद पैगंबर यांचे नातू हसेन आणि हुसैन हे दोघेही करबला येथे शहीद झाले होते. त्यांच्या स्मृतिप्रित्यर्थ मुस्लिम बांधव या दिवशी शोक व्यक्त करतात. सावंतवाडी शहरात सात ठिकाणी पीर उत्सव होतो. रात्री मोती तलाव येथे ताबूत विसर्जन करण्यात आले.
मोहरमपासून हिजरी संवत सुरू होते. हिजरी संवतचा हा पहिला महिना असतो. हजरत मोहम्मद पैगंबरांचे दोन्ही नातू करबला येथे शहीद झाले. इराकची राजधानी असलेल्या बगदादमधील करबला या गावात ‘तारीख-ए-इस्लाम’ हे ऐतिहासिक युद्ध झाले होते. मोहरम हा दु:खाचा दिवस आहे. या दिवशी हसेन आणि हुसैन यांचे बलिदान उजागर केले जाते. शिया समुदायातील लोक १० दिवस काळे कपडे घालतात. या बलिदानासाठी जुलूस काढला जातो. मोहरम निमित्त सावंतवाडीत सायंकाळी ताबूत फेरी काढली. रात्री उशीरा या पिरांचे विसर्जन केले. मोहरममधून सामाजिक ऐक्य जपण्याचे काम केले जाते. सालईवाडा येथे संस्थानकालीन मराठा सरदार घराण्याच्या नावाने असलेला ‘निंबाळकर पीर’ एकात्मतेचे प्रतीक मानला जातो. उभाबाजार येथे रात्री उशिरा सरदार निंबाळकर पीर, जलाल शहा पीर, तहसीलदार पीर, सय्यद पीर, म्हाताचे पीर, पटवीचे पीर, काझीचे पीर एकमेकांना भेटले. हिंदू बांधवांनीही पिराला ठिकठिकाणी गुळाचा नैवेद्य दाखविला. ‘मराठ्यांचा पीर’ अशी ओळख असलेला निंबाळकर पीर विसर्जनाला जात असताना कळसुलकर हायस्कूल येथील भवानी देवीच्या भेटीला गेला. यावेळी हिंदू बांधवांनी मुस्लिम बांधवांच्या पायावर पाणी घालत, नैवैद्य अर्पण करत परंपरा जपली. मुस्लिम बांधवांनीही भवानी देवीला साकडे घातले. पूर्वी भवानी मंदिरात पिराच्या पतवा ठेवल्या जात असत. त्यामुळे त्या ठिकाणी भवानी देवीला भेटण्याची प्रथा आहे. हिंदू-मुस्लिम सामाजिक ऐक्य यानिमित्ताने जपले गेले. एकीकडे आषाढी एकादशी व दुसरीकडे ताबूत विसर्जन असे दोन मोठे सण असल्याने पोलिसांचा कडेकोट बंदोबस्त होता.